Адлия вазирлиги томонидан барқарор ва самарали қонунчилик базасини яратиш мақсадида қонун ижодкорлиги жараёнларида “ақлли тартибга солиш” модели элементлари кенг қўллаб келинмоқда.

Шу жумладан, вазирлик қонунчилик ҳужжатларининг тартибга солиш таъсирини баҳолаш бўйича мувофиқлаштирувчи орган бўлиб, мунтазам равишда давлат органларига бу борада услубий ва методологик ёрдам кўрсатиб келади.

Хусусан, Адлия вазирлигида 2024 йилнинг 1 февралида “Амалдаги қонунчилик ҳужжатларни тартибга солиш таъсирини баҳолаш” мавзусида ўқув-амалий семинар ўтказилди.

Семинарда 20дан ортиқ вазирлик ва идораларнинг вакиллари ҳамда оммавий ахборот воситалари иштирок этди. Унда жорий йилда амалдаги қонунчилик ҳужжатларининг тартибга солиш таъсирини баҳолаш жараёнларининг муҳим жиҳатлари муҳокама қилинди.

Хусусан, Ўзбекистон Республикаси Президентининг 2024 йил 8 январдаги тегишли Фармони асосида 40 та муҳим иқтисодий ва ижтимоий-сиёсий аҳамиятга эга ҳамда кенг жамоатчиликнинг эътирозларига сабаб бўлаётган қонунчилик ҳужжатларини тартибга солиш таъсири баҳоланиши таъкидланди.

Семинар давомида ушбу баҳолаш аҳамияти ва тартиби, эришилган натижалар тўғрисида маълумот берилиб, амалдаги қонунчилик ҳужжатларини тартибга солиш таъсирини баҳолашдан ўтказиш борасида Адлия вазирлиги томонидан тушунтирилди ва муҳокама қилинди.

Шунингдек, ҳужжатларда кўрсатилган кўплаб мажбуриятлар тартибга солиш мақсадларига эришилганлиги ва ортиқча маъмурий юк мавжудлиги жиҳатидан қайта кўриб чиқилиши, баҳолаш натижаларига кўра самарадорлиги паст бўлган ёки кўзланган мақсадларга эришилмаган тартибга солиш воситаларини ўзгартириш, бекор қилиш ёки механизмини қайта кўриб чиқиш бўйича таклифлар ишлаб чиқилиши таъкидланди.

Шаҳзода ЭРГАШEВА,

ЎзДЖТУ Халқаро журналистика факультетининг 2-босқич талабаси.