Фото: Shutterstock

Археологлар Мисрда тахминан 3200 йиллик тарихга эга қабрни топди. Эҳтимолга кўра, у фиръавн Рамзес III даврида хизмат қилган ҳарбий қўмондонга тегишли бўлиши мумкин. Бу ҳақда Миср Туризм ва қадимий ёдгорликлар вазирлиги маълум қилди.

Вазирликка кўра, қабр мамлакат шимоли-шарқида жойлашган Телл-ал-Масхута археологик ҳудудидан топилган. Сағана пахса ғиштлардан қурилган бўлиб, дафн хонаси ва унга ёндош учта хонадан иборат.

Унинг ичкарисида тадқиқотчилар Рамзес III номи битилган олтин узук, шунингдек, камон ўқларининг бронза учларини топишга муваффақ бўлган. Бундан ташқари, ўйма нақшли кулолчилик идишлари ва фил суягидан ясалган мўъжаз қутича топилган.

Сопол идишлардан бирида милоддан аввалги XIII асрда ҳукмронлик қилган ва тахтга ўтиргунга қадар ҳарбий қўмондон бўлган фиръавн Хоремхебнинг номи битилган. Бу қабрда Хоремхебнинг тилга олиниши сабаби номаълум бўлиб қолмоқда.

Ҳозирча дафн этилган шахснинг аниқ идентификацияси имконсиз бўлса-да, топилмаларнинг характери ва дафн этиш контексти тадқиқотчиларни қабр Рамзес III давридаги ҳарбий қўмондонга тегишли эканига ишонтирмоқда.