Фото: Reuters

АҚШ президенти Дональд Трамп президентлик давридаги икки ой ичида АҚШ етакчиларидан ҳам кўпроқ нарсага эришганини айтди

АҚШ президенти Дональд Трамп “Newsmax” нашрига берган интервьюсида ҳокимиятдаги икки ой давомида мамлакат тарихидаги бошқа Америка президентларидан кўра кўпроқ ютуқларга эришганини айтди.

“Бунчалик қисқа вақт ичида ҳеч ким бунчалик кўп иш қилмаган. Икки ой ичида мен ҳар қандай президентдан кўпроқ иш қилдим, деб ўйлайман”, — дейди Трамп.

Шу муносабат билан АҚШ раҳбари давлат иқтисодиётига турли компаниялар томонидан сармоя жалб қилинганини таъкидлади ва шунингдек, юзлаб миллиард долларлик “фирибгарлик”лар аниқланганига эътибор қаратди.

Трамп, шунингдек, собиқ АҚШ президенти Жо Байден ва унинг маъмуриятини кечиришга ҳаракат қилаётганини тан олди, гарчи у уларни “жуда ёмон” ишлар қилган ва коррупциялашган деб ҳисобласа ҳам.

Дональд Трамп 2025 йил 20 январда Оқ уйга қайтиб, АҚШнинг 47-президенти бўлди. Трамп 2017 йилдан 2021 йилгача 45-президент сифатида мамлакатни бошқарганди. Иккинчи марта лавозимга киришиб, у ўзидан олдинги Жо Байденнинг барча “аҳмоқона” қарорларини бекор қилишга, шунингдек, Украинадаги можарога барҳам бериш ва учинчи жаҳон урушининг олдини олишга ваъда берганди. Маълум қилинишича, Трамп Байден маъмурияти томонидан қабул қилинган 78 та буйруқ ва меморандумни бекор қилган.