«Ипак йўли дурдонаси» XVI Тошкент халқаро кинофестивалида машҳур ҳинд кино юлдузи Ҳема Малини ва кинорежиссёри Умеш Меҳра иштирок этади.

«Қадрли дўстларим ва ўзбек халқи, мени халқаро кинофестивалга таклиф қилганларингиз учун миннатдорлик изҳор қиламан ҳамда тез кунларда Тошкентда бўлиб ўтадиган учрашувларни интиқлик билан кутиб қоламан», деб таъкидлаган Ҳема Малини ўзбек кино ихлосмандларига қилган видеомурожаатида.

Киноактёр, продюсер, режиссёр, раққоса ва сиёсатчи Ҳема Малини «Зита ва Гита», «Қасос ва қонун», «Самрат» ҳамда бошқа фильмларда ўйнаган роллари билан яхши таниш. Унинг машҳурлиги, айниқса, «Али бобо ва қирқ қароқчи» фильми кино экранларига чиққанидан сўнг янада юксакликка кўтарилган.

Кинотомошабинлар унинг сўнгги йилларда тушган фильмларидан бири — «Вир ва Зара»ни ҳам катта қизиқиш билан кутиб олган.

XVI Тошкент халқаро кинофестивали жорий йил 15-19 сентябрь кунлари ўтказилиши кутилмоқда.