Фото: Иллюстратив фото

Солиқ тўловчилардан келиб тушаётган мурожаатларни инобатга олган ҳолда, «Солиқчи-кўмакчи» тамойили асосида, 16 декабрдан бошлаб 20 кун давомида 2022 йил 1 январдан (1 январь ҳам киради) хато шакллантирилган электрон чекларни таҳрирлаш имконияти берилди.

Бунинг учун солиқ тўловчи my.soliq.uz сайтидаги шахсий кабинетида «ЙУШ онлайн-НКМ ва виртуал касса маълумотлари» саҳифасидан «Маркетплейс чекларини таҳрирлаш» бўлимига кирилади. Қидирув тизимига чекнинг фискал модули ва рақамини киритиб тузатиладиган чек топилади. Очилган ойнада чек маълумотлари таҳрирланади.

Хусусан, чек маълумотларини таҳрирлашда қуйидагиларни ўзгартириш мумкин:

— маҳсулот (хизмат) суммаси;

— миқдори;

— ҚҚС суммаси;

— МХИК;

— ўлчов бирлиги;

— комитент СТИР (комитент тасдиқлаган ҳолатда);

— тўлов шакли (нақд ёки терминал);

— чекнинг умумий суммаси.

Барча ўзгартиришлар киритилгандан сўнг, фақат битта файл — тадбиркорлик субъектининг ҳолат юзасидан батафсил тушунтириши баён этилган расмий хати (муҳрланган фирма бланкида) илова қилиниши лозим.

Тузатиш киритиш учун юборилган чеклар ҳудудий давлат солиқ бошқармасида тузилган ишчи гуруҳи билан келишилган ҳолда тезкорлик билан ўрганилади (МХИК, ўлчов бирлиги автомат тарзда қабул қилинади).

Кўриб чиқиш натижаси ижобий деб баҳоланса, чек ҳолати «қабул қилинган»га ўзгаради.

Рад этилган тақдирда солиқ органининг изоҳига кўра, тузатишлар киритилиб қайта юборилиши лозим.

Якунда, «Ҳисоблаш» ва «Жўнатиш» тугмаси босилади.

Истисно: истеъмолчиларга харид суммасидан 1 % қайтарилган (кешбэк) чеклар таҳрирланмайди.