Ўзбекистон Миллий кино санъати саройида «Сеҳрландия: қаҳрамонлик миссияси» номли янги анимацион фильмнинг тантанали тақдимоти ўтказилди.

Болалар контентини ривожлантириш маркази буюртмасига асосан «Лола Animation» студияси томонидан яратилган ушбу лойиҳа минтақадаги илк 3D форматидаги тўлиқ метражли мультфильм сифатида тақдим этилди.

Тадбирда халқаро доира вакиллари, жумладан, The Walt Disney Company витсе-президенти, 8 карра «Эммй Award» мукофоти совриндори Ҳайма Вашингтон ҳамда маҳаллий маданият ва санъат намояндалари иштирок этишди.

Фильм ҳақида асосий маълумотлар:

Жанри: Фантастик саргузашт;

Аудиторияси: 5 ёшдан юқори бўлган болалар ва кенг жамоатчилик;

Ғояси: Дўстлик, жасорат, инсоф ва ватанпарварлик каби умуминсоний қадриятлар.

Фильм қаҳрамонларига Беҳзод Муҳаммадкаримов, Алишер Узоқов, Шаҳзода Муҳаммедова, Жаҳонгир Хўжаев ва Улуғбек Шодибеков каби таниқли санъаткорлар овоз берган.

Ўзбекистонда хизмат кўрсатган артист Бойир Холмирзаев интервью давомида лойиҳанинг аҳамиятига тўхталиб: «Ушбу мультфильм болалар учун яратилган энг шарафли ишлардан бири бўлди. Мураккаб жараён бўлишига қарамай, барча ижодкорлар бу ишга сидқидилдан ёндашган», — дея таъкидлади.

Мазкур анимацион фильм болаларда ижобий қаҳрамонлик образини шакллантириш, ўз-ўзига ишонч, фидойилик, эзгуликка интилиш, Ватанга муҳаббат ва жамият олдидаги масъулият ҳисларини кучайтиришга хизмат қилади.

Машҳура Алимардон, «Халқ сўзи».