Саид Донишев/«Халқ сўзи». Зоминда ўтказилган иккинчи Халқаро мақом санъати анжумани якунланди. Ғолиблик учун жаҳоннинг ўн олтита давлатидан 95 нафар мақом ижрочилари беллашди. Халқаро танлов иштирокчилари чиқишларини халқаро ҳайъат аъзолари баҳолаб борди. Халқаро анжуманнинг сўнги кунида ёпилиш маросими ва турли номинациялар бўйича ғолибларни тақдирлаш маросими бўлиб ўтди.

Ниҳоят, ҳаяжонли лаҳзалар. Ҳакамлар ҳайъати хулосасига кўра, 3-ўринни (ансамбль жамоаси) Хитойнинг «Шинжон» бадиий театри «Мақом» бадиий гуруҳи ва (яккахон ижрочи) – Ҳиндистон Али Амжад Хон эгаллади. 2-ўринни (ансамбль жамоаси) – Ўзбекистон Мақом маркази Жиззах ҳудудий бўлим мақом ансамбли ва (яккахон ижрочи) – Туркия Чидем Гурдал қўлга киритди. 1-ўрин (ансамбль жамоаси) – Ўзбекистон – Ўзбек миллий мақом санъати маркази Юнус Ражабий номидаги мақом хонандалари ансамбли ва (яккахон ижрочи) – Тожикистон – Тожикистон миллий консерваторияси гуруҳи солисти Хуршид Иброҳимзода сазовор бўлди. Анжуманининг бош соврини – Гран-при Эрон «Форс» ансамбли солисти Али Асғар Арабшоҳийга насиб этди.

— Ўзбекистон ва Эрон халқлари ўртасидаги маданий алоқалар узоқ тарихга эга. Мақом халқаро анжумани асрий маданий алоқаларимизни давомли бўлишига мустаҳкам замин яратди, — дейди Гран-при совриндори Али Асғар Арабшоҳий. — Анжуманда бош совринни қўлга киритганимдан жуда хурсандман. Меҳмондўстлик ва юксак рағбат учун ташаккур!

Шунингдек, анжуман доирасида фаол ижрочиларни қўллаб-қувватлаш ва рағбатлантириш мақсадида таъсис этилган «Энг яхши мақом хонандаси», «Энг яхши мақом созандаси», «Энг яхши мақом устози», «Энг яхши мақом тарғиботчиси», «Энг яхши ёш мақомчи», «Энг яхши мақом бастакори» каби номинациялар бўйича иштирокчилар Ўзбекистон Республикаси Маданият вазирлиги ҳамда Жиззах вилояти ҳокимлигининг рағбатлантирувчи совға ва мукофотлари билан тақдирланди.

Ғолибларни Ўзбекистон Республикаси маданият вазири Озодбек Назарбеков ҳамда Жиззах вилояти ҳокими Эргаш Солиев тақдирлашди.

Шу билан бирга анжуманнинг ҳар бир иштирокчисига «Халқаро мақом санъати анжумани иштирокчиси» сертификати тақдим этилди.