Кеча, 7 январь куни Англия Премьер-лигасининг 21-тур ўйинлари бўлиб ўтди. Кун доирасидан ўрин олган баҳсда Ўзбекистон миллий терма жамоаси аъзоси Абдуқодир Ҳусанов тўп сураётган «Манчестер Сити» клуби ўз майдонида «Брайтон» жамоасини қабул қилди.

Учрашув 1:1 ҳисобидаги дуранг натижа билан якунланди. Баҳсда ҳисоб 41-дақиқада пенальтидан очилди. «Манчестер Сити» ҳужумчиси Эрлинг Ҳоланд 11 метрли жарима зарбасини бехато амалга оширди. Биринчи бўлим 1:0 ҳисобида якунланди.

Иккинчи бўлимнинг 60-дақиқасида Каору Митома меҳмонларнинг жавоб голига муаллифлик қилди. Шу тариқа ўйин 1:1 ҳисобида якунланди.

Ўзбекистон миллий терма жамоаси аъзоси Абдуқодир Ҳусанов бу гал 3,5 ойлик танаффусдан сўнг яна Премьер-лига доирасидаги ўйинни асосий таркибда бошлади. Футболчи сўнгги бор 2025 йил сентябрь ойида бўлиб ўтган «Арсенал» — «Манчестер Сити» (1:1) ўйинида асосий таркибдан ўрин олган эди.

Абдуқодир ўйинни анча ишончли ўтказди. У қатнашган 4 та тўп учун курашнинг барчасида ғалаба қозонди. Шунингдек, у амалга оширган 71 та узатманинг 94 фоизи аниқ чиқди. «Sofascore» портали мутахассислари Абдуқодирнинг кечаги ўйинини 7,1 баллга баҳолашди.