Kecha, 7-yanvar kuni Angliya Premyer-ligasining 21-tur oʻyinlari boʻlib oʻtdi. Kun doirasidan oʻrin olgan bahsda Oʻzbekiston milliy terma jamoasi aʼzosi Abduqodir Husanov toʻp surayotgan “Manchester Siti” klubi oʻz maydonida “Brayton” jamoasini qabul qildi.

Uchrashuv 1:1 hisobidagi durang natija bilan yakunlandi. Bahsda hisob 41-daqiqada penaltidan ochildi. “Manchester Siti” hujumchisi Erling Holand 11 metrli jarima zarbasini bexato amalga oshirdi. Birinchi boʻlim 1:0 hisobida yakunlandi.

Ikkinchi boʻlimning 60-daqiqasida Kaoru Mitoma mehmonlarning javob goliga mualliflik qildi. Shu tariqa oʻyin 1:1 hisobida yakunlandi.

Oʻzbekiston milliy terma jamoasi aʼzosi Abduqodir Husanov bu gal 3,5 oylik tanaffusdan soʻng yana Premyer-liga doirasidagi oʻyinni asosiy tarkibda boshladi. Futbolchi soʻnggi bor 2025-yil sentyabr oyida boʻlib oʻtgan “Arsenal” — “Manchester Siti” (1:1) oʻyinida asosiy tarkibdan oʻrin olgan edi.

Abduqodir oʻyinni ancha ishonchli oʻtkazdi. U qatnashgan 4 ta toʻp uchun kurashning barchasida gʻalaba qozondi. Shuningdek, u amalga oshirgan 71 ta uzatmaning 94 foizi aniq chiqdi. “Sofascore” portali mutaxassislari Abduqodirning kechagi oʻyinini 7,1 ballga baholashdi.