«Тошкент беш ташаббус» ҳаракати доирасида Маданият вазири Озодбек Назарбеков ёшлар билан мулоқот қилди ва тадбирда сўнг журналистлар билан суҳбатлашди. 

«Халқ сўзи» мухбири Инобат АҲАТОВАнинг хабар беришича, вазир «Мендирман Жалолиддин» фильмига жамоатчиликнинг муносабати, хусусан, фильмда тарихий ҳақиқат бузилганлиги ҳақидаги эътирозларга жавоб қайтарган.

«Кинонинг танқид қилиниши кутилган ҳолат эди, бу табиий ҳол. Кино кўпроқ тарихчилар, зиёлилар томонидан танқидга учраши мумкин. Ўзбекистондаги тарихчилар кино билан ҳамкорлик нуқтаи назаридан неччи йиллик тажрибага эга?! Ҳамкорлик мутлақо йўқ! Ҳамкорлик бўлмагандан сўнг кескин қарама-қаршиликлар бўлади ва охири ўртача бир ечимга келинади. Бадиий фильм бадиийликни, тарих эса фактларни талаб қилади. Бизда ҳали тарихчилар ва киночилар ўртасида ҳеч қандай ҳамкорлик йўқ.  

Бу («Мендирман Жалолиддин».таҳр) ўз номи билан бадиий фильм. Бу унинг ҳар қандай тўқима воқеадан фарқи йўқ дегани. Кинони ҳадеб тарихий фактлар томон тортавериш керак эмас, бу бадиий фильм деяпмиз. Кинода Жалолиддин образи бор, бошқа энг муҳим образлар мавжуд. Мақсадимиз бизнинг Жалолиддин деган миллий қаҳрамонимиз бўлганлиги ва уни қаҳрамон ўлароқ кўрсата олсак бўлди. Унинг ҳақиқати керак бўлса, сиз, кечирасиз, тарихий манбалардан билиб олаверинг. Муҳими биз сизнинг эътиборингизни фильмга торта олдикми, бўлди. Сизлар кинодан тарихий фактлар ўрганаман десангиз хато қилган бўласиз. Ҳақиқатни ўрганиш учун кинога мурожаат қилинмайди, манбалар, тарихий фактларга мурожаат қилинади.

Фильмнинг давоми бўлади, ҳозир бироз танаффусдамиз. Фильмнинг кейинги мавсумларини суратга олишга ҳаракат бошланган. Менимча, бир ойлардан сўнг тасвирга олиш бошланса керак», деди Озодбек Назарбеков.