“Toshkent besh tashabbus” harakati doirasida Madaniyat vaziri Ozodbek Nazarbekov yoshlar bilan muloqot qildi va tadbirda soʻng jurnalistlar bilan suhbatlashdi. 

“Xalq soʻzi” muxbiri Inobat AHATOVAning xabar berishicha, vazir “Mendirman Jaloliddin” filmiga jamoatchilikning munosabati, xususan, filmda tarixiy haqiqat buzilganligi haqidagi eʼtirozlarga javob qaytargan.

«Kinoning tanqid qilinishi kutilgan holat edi, bu tabiiy hol. Kino koʻproq tarixchilar, ziyolilar tomonidan tanqidga uchrashi mumkin. Oʻzbekistondagi tarixchilar kino bilan hamkorlik nuqtayi nazaridan nechchi yillik tajribaga ega?! Hamkorlik mutlaqo yoʻq! Hamkorlik boʻlmagandan soʻng keskin qarama-qarshiliklar boʻladi va oxiri oʻrtacha bir yechimga kelinadi. Badiiy film badiiylikni, tarix esa faktlarni talab qiladi. Bizda hali tarixchilar va kinochilar oʻrtasida hech qanday hamkorlik yoʻq.  

Bu (“Mendirman Jaloliddin”.tahr) oʻz nomi bilan badiiy film. Bu uning har qanday toʻqima voqeadan farqi yoʻq degani. Kinoni hadeb tarixiy faktlar tomon tortaverish kerak emas, bu badiiy film deyapmiz. Kinoda Jaloliddin obrazi bor, boshqa eng muhim obrazlar mavjud. Maqsadimiz bizning Jaloliddin degan milliy qahramonimiz boʻlganligi va uni qahramon oʻlaroq koʻrsata olsak boʻldi. Uning haqiqati kerak boʻlsa, siz, kechirasiz, tarixiy manbalardan bilib olavering. Muhimi biz sizning eʼtiboringizni filmga torta oldikmi, boʻldi. Sizlar kinodan tarixiy faktlar oʻrganaman desangiz xato qilgan boʻlasiz. Haqiqatni oʻrganish uchun kinoga murojaat qilinmaydi, manbalar, tarixiy faktlarga murojaat qilinadi.

Filmning davomi boʻladi, hozir biroz tanaffusdamiz. Filmning keyingi mavsumlarini suratga olishga harakat boshlangan. Menimcha, bir oylardan soʻng tasvirga olish boshlansa kerak», dedi Ozodbek Nazarbekov.