Иллюстратив фото

Россия, Япония ва БАА компаниялари Ўзбекистондаги кўмирда ишловчи Ангрен ва Янги Ангрен ИЭСнинг ишончли бошқарувини олишга даъвогарлик қиляпти. Бу ҳақда “Ўзбекэнерго” раиси ўринбосари Ф.Қурбонов маълум қилди.

“Биз Ангрен ва Янги Ангрен ИЭСни ишончли бошқарувга беришнинг биринчи босқичидан ўтдик. Россия, Япония ва БААдан инвесторлар ушбу объектларни бориб кўришди. Ҳозирда мазкур давлатлар компаниялари бизга тижорий таклифлар тайёрлашмоқда. Уларни олганимиздан сўнг биз Молия вазирлиги ҳузуридаги Давлат-хусусий шерикликни ривожлантириш агентлиги экспертлари билан ҳамкорликда тақдим этилган ҳужжатларни таҳлил қиламиз ва энг яхши вариантни таклиф этган инвесторга станцияларни ишончли бошқарувга бериш бўйича таклифни ҳукумат муҳокамасига киритамиз”, - деди у.

Бундан олдин “Ўзбекэнерго” бошқаруви раиси У.Мустафоев Ангрен ва Янги Ангрен ИЭСни Россиянинг “Интер РАО ЕЭС” компанияси, шунингдек, номи айтилмаган хитойлик сармоядорга бериш бўйича бир нечта вариант кўриб чиқилаётганини маълум қилганди.

“Ўзбекистонда бугунги кунда 10 та электр станцияси фаолият юритмоқда, улардан иккитаси - Ангрен ва Янги Ангрен ИЭС кўмирда ишлайди. Кўмир саноати ва шу йўналишдаги энергетика дунё даражасида Россия ва Хитойда ривожланган. Ва биз бу икки станцияни ушбу мамлакатлардаги инвесторларга бериш ёки сотишни таклиф этяпмиз. Айни пайтда объектларни баҳолаш ишларини олиб бормоқдамиз. Қачондир ушбу жараённи ҳам бошлаш керак”, - деган эди у ўтан йили.

Эслатиб ўтамиз, шу йил февраль ойи бошида давлат раҳбари Энергетика вазирлигига “Ўзбекэнерго” ва “Ўзбекнефтегаз”ни реструктуризация қилиш бўйича топшириқлар берганди.

“Ўзбекэнерго” маҳаллий электр энергетика тизимини реструктуризация қилиш моделини ишлаб чиққан. У шу йил март ойи охирида ҳукумат томонидан тасдиқланиши режалаштирилмоқда.