Фото: “Дунё” АА

Ўзбекистон элчиси Бахтиёр Ибрагимов Халқаро атом энергияси агентлиги (ХАЭА) бош директори ўринбосари, Техник ҳамкорлик департаменти раҳбари Лю Хуа билан учрашув ўтказди.

Бу ҳақда “Дунё” хабар бермоқда. Суҳбат чоғида икки томонлама ҳамкорликнинг муҳим жиҳатлари муҳокама қилинди. Лю Хуа Техник ҳамкорлик департаменти Ўзбекистонда атом энергетикасини ривожлантириш, замонавий ядро технологияларини жорий этиш ва қўллашда бундан кейин ҳам ёрдам кўрсатишга тайёрлигини таъкидлади.

Мулоқот чоғида Агентликнинг 2024-2025-йилларга мўлжалланган янги техник ҳамкорлик дастурига алоҳида эътибор қаратилди. Дастурда Ўзбекистоннинг кадрлар салоҳиятини ошириш ҳамда атом энергетикаси ва хавфсизлиги, соғлиқни сақлаш ва экологик муаммоларни ҳал этишда ҳамкорликда фаолият олиб боришга қаратилган янги миллий лойиҳаларни амалга ошириш кўзда тутилган.

ХАЭА бош директори ўринбосари зооноз касалликларга (“ZODIAC”), пластик ифлосланишга (“NUTEC Plastics”), саратонга (“Rays of Hope”) қарши кураш ва қишлоқ хўжалиги маҳсулдорлигини ошириш (“Atoms4Food”) бўйича ХАЭАнинг янги ташаббуслари доирасида амалга оширилаётган лойиҳаларда Ўзбекистон мутахассисларининг иштирокини кенгайтириш ҳамда бу борадаги ҳамкорликни жадаллаштиришни таклиф қилди. Лю Хуа, шунингдек, “Atoms4Food” лойиҳасини Ўзбекистон билан энг истиқболли ҳамкорлик сифатида эътироф этди.

Ушбу лойиҳа ХАЭА ва ФАОнинг қарийб 60 йил давомида тўплаган ядро ва изотоп технологияларидан фойдаланишда мамлакатларни қўллаб-қувватлаш бўйича қўшма тажрибасига таянади.