Foto: “Dunyo” АА

Oʻzbekiston elchisi Baxtiyor Ibragimov Xalqaro atom energiyasi agentligi (XAEA) bosh direktori oʻrinbosari, Texnik hamkorlik departamenti rahbari Lyu Xua bilan uchrashuv oʻtkazdi.

Bu haqda “Dunyo” xabar bermoqda. Suhbat chogʻida ikki tomonlama hamkorlikning muhim jihatlari muhokama qilindi. Lyu Xua Texnik hamkorlik departamenti Oʻzbekistonda atom energetikasini rivojlantirish, zamonaviy yadro texnologiyalarini joriy etish va qoʻllashda bundan keyin ham yordam koʻrsatishga tayyorligini taʼkidladi.

Muloqot chogʻida Agentlikning 2024-2025-yillarga moʻljallangan yangi texnik hamkorlik dasturiga alohida eʼtibor qaratildi. Dasturda Oʻzbekistonning kadrlar salohiyatini oshirish hamda atom energetikasi va xavfsizligi, sogʻliqni saqlash va ekologik muammolarni hal etishda hamkorlikda faoliyat olib borishga qaratilgan yangi milliy loyihalarni amalga oshirish koʻzda tutilgan.

XAEA bosh direktori oʻrinbosari zoonoz kasalliklarga (“ZODIAC”), plastik ifloslanishga (“NUTEC Plastics”), saratonga (“Rays of Hope”) qarshi kurash va qishloq xoʻjaligi mahsuldorligini oshirish (“Atoms4Food”) boʻyicha XAEAning yangi tashabbuslari doirasida amalga oshirilayotgan loyihalarda Oʻzbekiston mutaxassislarining ishtirokini kengaytirish hamda bu boradagi hamkorlikni jadallashtirishni taklif qildi. Lyu Xua, shuningdek, “Atoms4Food” loyihasini Oʻzbekiston bilan eng istiqbolli hamkorlik sifatida eʼtirof etdi.

Ushbu loyiha XAEA va FAOning qariyb 60 yil davomida toʻplagan yadro va izotop texnologiyalaridan foydalanishda mamlakatlarni qoʻllab-quvvatlash boʻyicha qoʻshma tajribasiga tayanadi.