Малайзиянинг йирик кундалик нашрларидан бўлган “The New Straits Times” газетасида “Йил охиригача “Batik Air” Куала-Лумпур ва Тошкент шаҳарлари ўртасида тўғридан-тўғри авиақатновларни йўлга қўяди” сарлавҳали мақола эълон қилинди.

Мақолада “Batik Air” (собиқ “Malindo Air”) лоукостер авиакомпаниясининг стратегик ривожланиш бўйича директори Чандран Рама Мути ушбу авиаташувчи Малайзия ва Ўзбекистон ўртасида ҳафтасига уч марта авиақатновлар амалга ошириш режалаштирилаётгани, биринчи рейс шу йилнинг ноябрь ёки декабрь ойларида бошланишини маълум қилган.

Чандран Рама Мутининг “The New Straits Times” газетаси мухбири билан суҳбатда билдиришича, “Batik Air” айни пайтда Ислом Каримов номидаги Тошкент халқаро аэропорти расмийлари билан музокаралар олиб бормоқда ва парвозларни бошлаш учун рухсат берилишини кутмоқда. “Тошкент Қозоғистоннинг Олмаота шаҳри билан солиштирганда каттароқ бозор. Биз ҳали Тошкент халқаро аэропорти билан музокаралар олиб боряпмиз. Тошкент халқаро аэропорти Ўзбекистондаги энг йирик халқаро аэропорт бўлиб, 2019 йилда йўловчи ташиш ҳажми бўйича Марказий Осиё аэропортлари ичида учинчи ўринни эгаллаган.

“Пайшанба куни “Uzbekistan Airports” АЖ Сингапурнинг “Changi Airports International” компанияси билан Тошкент халқаро аэропортини ривожлантириш бўйича ҳамкорликни йўлга қўйганлигини эълон қилди, чунки Ўзбекистонда туризм саноати жадал суръатларда ривожланмоқда”, дейди Чандран Рама Мути.

Мақолада таъкидланишича, Тошкент халқаро аэропорти билан бир қаторда “Ўзбекистон ҳаво йўллари” миллий авиакомпанияси ҳам ўз парвозларини бутун дунё бўйлаб, жумладан, Куала-Лумпургача жадаллик билан кенгайтирмоқда”.

Авиакомпания 2022 йил ноябрь ойидан бошлаб ҳафтасига икки марта Тошкент-Куала-Лумпур йўналиши бўйича тўғридан-тўғри авиақатновларни йўлга қўйди. У Тошкентдан Париж, Милан, Пекин, Токио ва Жакартага ҳам парвозларни амалга оширмоқда.

“Ўзбекистон ҳаво йўллари” миллий авиакомпанияси жорий йилнинг июнь ойидан Бангкок шаҳрига парвозларни йўлга қўяди.

“Batik Air” “Куала-Лумпур-Тошкент” йўналишида “Боинг” компаниясининг тор фюзеляжли “B737 МАХ8» ёки “Airbus”нинг кенг фюзеляжли “A330» самолётларидан фойдаланиши мумкин, чунки улар 8,5 соатгача парвоз қилиши мумкин.

Маълумот ўрнида таъкидлаш жоиз, “The New Straits Times” газетаси 1845 йилда Малайзиядаги ягона инглиз тилидаги кўп саҳифали нашр ўлароқ ташкил этилган бўлиб, у мамлакатнинг энг кўҳна газетаси ҳисобланади. Кундалик тиражи 200 минг нусхадан ошади. Электрон нашрининг кундалик ўқувчилари сони 5 миллиондан ортиқ.