Ўзбекистон — ёшлар мамлакати. Шу боис, ёшлар таълим-тарбияси ва камолотига алоҳида эътибор қаратилади. Ёшларни ҳуқуқий ва ижтимоий муҳофаза қилиш, истеъдодини қўллаб-қувватлаш масалалари ҳам устуворлик касб этяпти.

Олий таълим соҳасидаги ислоҳотлар ва имкониятлар эса йигит-қизларнинг малакали мутахассис бўлиб ҳаётга кириб келишида, қолаверса, кўплаб фан олимпиадаларида, нуфузли халқаро танловларда юқори натижаларни қўлга киритишларида муҳим ўрин тутяпти, десак, айни ҳақиқат.

Тошкент давлат иқтисодиёт университети 3-босқич талабаси Феруз Ҳакимов мамлакатимизда ёшларга яратиб берилаётган таълим имкониятларидан унумли фойдаланиб, бир қатор ютуқларга эришаётган ана шундай иқтидорли ёшлардан биридир.

У жорий йилнинг 24 — 28 апрель кунлари Россиянинг Екатеринбург шаҳрида “XIII Евроосиё иқтисодчи ёшлар форуми” доирасида ўтказилган “Россия, яқин ва узоқ хориж мамлакатларида тадбиркорлик фаолиятини ҳисобга оид таҳлилий қўллаб-қувватлаш” халқаро илмий лойиҳалар танловининг ғолиби бўлди.

Хўш, Ф. Ҳакимов бу ютуқларга қандай эришди? Унинг келгусидаги мақсад ва интилишлари, режалари нималардан иборат?

Суҳбатимиз чоғида ушбу саволларга Ф. Ҳакимовдан батафсил жавоб олдик.

— Мактаб вақтида ҳамма фанга қизиққанман. Ҳамма фанларни бирдек ўрганишга ҳаракат қилганман. Лекин аниқ бир йўналишдан кетиш мақсади бўлган эмас. Ўқитувчиларимдан маслаҳат сўрасам ўзининг соҳасини тавсия қилишган. Менинг фақат битта мақсадим бўлган, етук кадр бўлишим учун нима қилишим керак.

Тил билишим керак, математикани яхши ўрганишим керак, тарихни билишим керак шунда битирув синфига келган вақтимда қайси соҳадан кетсам ҳам ишим енгил бўлади, деб ўйлаганман. 10-синфлигимда халқаро иқтисодиёт ва молия олимпиадаси бўлиб қолган. Устозим менга инглиз тилини билганлигим сабабли шу олимпиадада қатнашиб кўр деган, мен рози бўлганман.

Мактаб босқичидан ўтдим, кейин туман, кейин вилоят босқичига чиққанман. Вилоят босқичи қийин бўлган, ёзма ва тест шаклида топширганмиз. Соҳа иқтисод бўлганидан кейин саволлар ҳам қийин. Хуллас топширганмиз, жавоблар эълон қилинганида қарасам биринчи ўринни қўлга киритибман. Ёш ва тажрибасиз бўлганим учун буни кутмагандим. Бу олимпиадага тайёрланиш учун инглиз тилидан луғатлар ёдлаганман, бир қатор китоблар ўқиб чиққанман.

Бундан кейин Республика босқичида ҳам фахрли ўринни қўлга киритганимдан кейин устозларим менга айтишган, сен иқтисод соҳаси бўйича кет, бу соҳада сенинг билиминг бор экан дейишган. Шу воқеалар сабаб бўлиб олдимга мақсад қўйганман, мен иқтисод бўйича кетаман. Шу бўйича ўқидим, изландим, устозларимнинг қўллаб – қувватлови ва ота – онамнинг дуолари билан Тошкент давлат иқтисодиёт университетига ўқишга кирганман.

Ўзбекистон йилдан-йилга ҳар бир соҳада ривожланиб юқори поғоналарга кўтарилиб боряпти. Турли хил форумлар, учрашувлар, йиғилишлар айнан бизнинг давлатимизда ўтказилаяпти. Бу мамлакатимизнинг дунёда ўз ўрнини эгаллаётганидан дарак беради.

Шунинг учун ҳам бундай олимлар бизнинг давлатга қизиқиш билдириб ташриф буюришяпти. Шахсан бизнинг университетга ҳам Нобел мукофоти лауреати Рае Квон Чунг ташриф буюрди, у билан ҳамкорлик қиляпмиз. Яқинда 16 — 18 май кунлари Самарқанд шаҳрида Европа тикланиш ва тараққиёт банкининг йиғилиши бўлиб ўтди. Унда дунёнинг кўплаб давлатларидан экспертлар қатнашди. Бу ҳам Ўзбекистоннинг ўз тараққиёт йўлидан кетаётганининг бир белгисидир.

Давлатни ривожлантириш учун айнан бирор катта ишни қилишингиз шарт эмас. Сиз бирор соҳани эгаллайсиз ва шу йўналиш бўйича қўлингиздан келган ишларни амалга оширасиз. Мана шу ҳам сизнинг юртингиз ривожи йўлида қилаётган бир хизматингиздир. Ҳозир эса мен яна ҳаракат қиляпман. Мақсадим, биринчи навбатда, тил ўрганиш, ўз соҳамнинг етук мутахассиси бўлиш ҳамда чет элда ўқиб, эгаллаган билимларимни Ўзбекистонда татбиқ қилишдир.

Тенгқурларимга шуни айтишни истардимки, олдингизга бирор мақсад қўйдингизми, орқага чекинманг. Сиз бу йўлда қийинчиликларга учраяпсизми, демак тўғри йўлдасиз. Бу йўлнинг охирига етишингиз учун кеча-ю кундуз меҳнат қилишингиз керак.

Ўзим иқтисод бўйича ўқиганим учун устозим иқтисодиёт фанлари доктори, профессор Муҳиддин Калонов билан бирга солиқ сиёсатига оид китоб чоп қилдик. Устозимнинг ўзи жуда кўплаб китоблар чоп этган, бу китобларнинг ҳар бирини катта қизиқиш билан ўқийман. Шундан кейин устоз билан китоб ёзиш ғояси келди менга.

Биз иқтисод соҳасида ўқиймиз лекин бу билан чекланиб қолганимиз йўқ, “Муқимий асарларида ижтимоий-иқтисодий муаммолар долзарблиги” мавзуида илмий рисола ҳам чоп этдим. Бу рисола орқали Муқимийнинг ҳаёти, асарлари, ҳаётидаги жараёнлар, иқтисодий таҳлиллари, ўша давр воқеаликларини ёритиб беришга ҳаракат қилдим.

Албатта, замон шиддат билан ривожланиб боряпти. Биз ҳам замонга яраша интеллектга эга бўлишимиз керак. Мен мана шу йўлда ҳаракат қилиб, жонажон Ўзбекистонимизни янада гуллаб яшнаши йўлида сидқидилдан ҳисса қўшмоқчиман. Бунинг учун бизга барча имкониятлар яратиб берилган. Бу бизни кўзлаган марраларга эришишимизда катта мотивация беради.

ЎзЖОКУ талабаси Бунёд БОБОХОНОВ ёзиб олди.