Исроил Сурияга зарба берди, қурбонлар бор

Исроил ракеталари ҳужуми оқибатида Суриянинг Марказий қисмида камида 14 киши ҳалок бўлди. Бу ҳақда давлат оммавий ахборот воситалари хабар берди.

Суриянинг расмий ахборот агентлиги SANA хабарига кўра, якшанба куни кечқурунги ҳужум ёнғин келтириб чиқарган ва Хама вилоятидаги Масьяф шаҳрига моддий зарар етган. Шунингдек, 43 киши жароҳат олиб, 5 киши ҳалок бўлган. Ҳудуддаги шифохона раҳбари қурбонлар тинч аҳоли вакиллари эканлигини таъкидлаган.

«Якшанба куни кечқурун соат 23:20 атрофида Исроил Ливан шимоли-ғарби томонидан ҳаво ҳужумини бошлади ва Марказий минтақадаги бир қатор ҳарбий жойларни нишонга олди. Бизнинг ҳаво ҳужумидан мудофаа тизимларимиз агрессиянинг ракеталарига дуч келди ва уларнинг айримларини уриб туширди», — деб хабар берган ҳарбий бўлинма SANA агентлигига.

Исроил ҳарбийлари одатда Суриядаги операциялари ҳақида изоҳ бермайди. Икки минтақавий разведка манбаларининг таъкидлашича, Масьяф яқинида жойлашган кимёвий қурол ишлаб чиқариш бўйича йирик ҳарбий тадқиқот марказига зарар етган. «Reuters» ахборот агентлигининг қўшимча қилишича, у ерда қурол-яроғ ишлаб чиқариш билан шуғулланадиган эронлик ҳарбий экспертлар гуруҳи ишлайди.

Суриянинг 13 йиллик фуқаролар уруши давомида Исроил мунтазам равишда мамлакатда ҳаво ҳужумларини амалга оширди. Улар асосан Эрон билан боғлиқ жойларни нишонга олган. Якшанба кунги ҳужум минтақавий кескинликлар кучайиб бораётган паллада амалга оширилди. Эрон расмийлари ҳали ҳам июль ойида Теҳронда ҲАМАС бошлиғи Исмоил Ханиянинг ўлдирилишига жавоб беришга ваъда бермоқда. Суиқасдга 40 кундан ошдики, Эроннинг ваъда қилинган ҳужуми амалга ошмаяпти.

Ливан Исроил билан Жанубий чегарасида кучайиб бораётган кескинликлар билан курашмоқда ва бу янада кенгроқ минтақавий уруш қўрқувини келтириб чиқармоқда. 11 ойдан бери Ғазога қарши давом этаётган уруш Ливаннинг ички, минтақавий ва халқаро жабҳадаги кучларини заифлаштирди. Ливаннинг олдинга силжиши ва бу ўзгарувчан геосиёсий ўйинларга қандай бардош бера олиши ҳақида саволлар туғилади.

Россия Курскдаги АЭСни ёпиши мумкин

Россия Украинанинг чегара минтақасига бостириб кириши давом этаётгани сабабли Курск атом электр станциясини ёпиш масаласини кўриб чиқмоқда. Россия атом энергетикаси агентлиги раҳбари Алексей Лихачёв бу вариант Украина кучлари олдинга силжиши билан муҳокама қилинаётганини тасдиқлаган.

Маълум қилинишича, бу борада якуний қарор қабул қилингани йўқ, ҳозирда заводнинг тўртта агрегатидан фақат биттаси ишлаб турибди. Курск атом электр станцияси ушбу шаҳардан 40 километр ғарбда ва Украина чегарасидан тахминан 110 километр узоқликда жойлашган.

Россия матбуоти эҳтиёт чораси сифатида завод атрофида қўшимча ҳимоя воситалари қурилаётганини хабар қилди. Курск вилоятида тўқнашувлар Украина кучлари август ойи бошида ҳудудга кирганидан кейин кучайганди. Александр Сладков каби баъзи россиялик блогерлар Украина атом станциясини ўз назоратига олишга ҳаракат қилиши мумкин, деб тахмин қилишди.

Шунга қарамасдан, Украинанинг бундай ниятлари борлигини тасдиқловчи далиллар йўқ. БМТнинг Атом энергияси бўйича халқаро агентлиги раҳбари Рафаэль Гросси август ойи охирида заводга ташриф буюрган ва вазият ядровий хавф туғдираётганини тан олган эди.

Россия президенти Владимир Путин Украина кучлари Курск атом электр станциясини нишонга олишга ҳаракат қилгани ҳақида ўз фикрини билдирганди. У бу тахмин қилинган зарбаларни «жуда хавфли терактлар» деб таърифлаб, Россия жавоб қайтарса, Европа учун эҳтимолий оқибатларга ишора қилган.

Лихачёв Курск АЭСнинг минтақани энергия билан таъминлашдаги аҳамиятини таъкидлаб, иложи бўлса, унинг ишлашини сақлаб қолиш муҳимлигини айтди. Унинг қайд этишича, ҳозирда завод атрофидаги хавфсизлик чоралари етарли даражада деб ҳисобланмоқда. Шунга қарамай, давом этаётган можаро туфайли заводнинг фаолияти тўхтатиб қўйилиши ҳам мумкин.

Қироллик Бирлашган хизматлар институти (RUSI) экспертларининг таъкидлашича, Россия заводга таҳдидни сиёсий сабабларга кўра бўрттириб кўрсатаётган бўлиши мумкин. Уларнинг фикрича, Москва Украинага қарши урушда ядровий авария қўрқувидан ўз манфаати учун фойдаланмоқда.

Россия Украина бўйича навбатдаги тинчлик конференциясида иштирок этиши керак, деган фикрда Германия канцлери.

Олаф Шольц Украина президенти Владимир Зеленский билан яқинда бўлган махфий суҳбатини эслатиб ўтди. Германия канцлерининг сўзларига кўра, Зеленский Россиянинг навбатдаги тинчлик конференциясида иштирок этишига рози бўлган. Шольцга кўра, тинчликка эришиш учун муҳокама қилинадиган пайт келган.

Хитой Россиядаги активларини камайтирмоқда

Хитой давлат банклари Россиядаги активларини камайтирмоқда. Хабарларга кўра, бунда Москвага қарши санкциялар икки давлат ўртасидаги савдони мураккаблаштиргани сабаб бўлган. «Newsweek» вазият жиддийлашаётгани ҳақида ёзган.

Маълум бўлишича, 2024 йилнинг иккинчи чорагида Хитой давлат банки Россиядаги активларини 37 фоизга, Хитой саноат ва тижорат банки эса 27 фоизга қисқартирди. Ушбу ҳаракатлар халқаро санкциялар туфайли тўловлар билан боғлиқ ортиб бораётган қийинчиликларни кўрсатиб беради.

Шунда қарамасдан, Хитойнинг энг йирик банклари томонидан қисқартиришларга қарамай, «China Construction Bank» ва «China Agricultural Bank» каби кичикроқ муассасалар Россиядаги активларини оширди.

Қайд этилишича, ушбу банклар ҳам халқаро транзакцияларда қийинчиликларга дуч келишмоқда ва умуман олганда, Хитой банклари Россияда етарли даражада ўзини хавфсиз ҳис қилмаяпти.

Россия корхоналари Хитой банклари орқали тўловларни амалга оширишни қийинлаштирмоқда. Хитой банклари кўпроқ эҳтиёткор бўлиб, талабларга риоя қилишни истайди ва санкцияланган Россия товарлари ёки компаниялари билан боғлиқ тўловларни рад этишади. Бу эса ўз навбатида Москвага маъқул келмаяпти.