“Халқ сўзи ONLINE”

Бугун коронавирус аталмиш офат кириб бормаган давлат деярли қолмади. Ҳажми зарранинг заррасича келадиган бу кўзга кўринмас вирус бутун дунёни алғов-далғов қилиб юборди. Унинг жаҳон иқтисодиётига салбий таъсири кўлами жиҳатидан инсоният дуч келган инқирозлар ичида энг каттаси бўлиши тахмин қилинмоқда.

Кун келиб иқтисодий-молиявий зарарлар, албатта, тикланади. Аммо эътиборсизлик туфайли “тождор” вирус тарқалиб, саломатликка путур етиши оқибатида юзага келадиган йўқотишларни ҳеч нарса билан ўлчаб ҳам, унинг ўрнини тўлдириб ҳам бўлмайди. Негаки, ҳали давоси топилмаган ушбу касаллик таъсирида ҳаётдан кўз юмаётганлар сони, афсуски, кун сайин ортмоқда.

Инсон шахси олий қадрият, унинг саломатлиги ҳамма нарсадан устун қўйилган мамлакатимизда эпидемиологик вазиятни жиловлаш, аҳолини бу офат чангалидан эсон-омон олиб чиқиш учун зарур чоралар кўриляпти. Давлатимиз раҳбари ташаббуси билан иқтисодиёт тармоқлари, тадбиркорлик субъектларини қўллаб-қувватлаш, аҳоли ижтимоий ҳимоясини кучайтиришга Давлат бюджетидан катта маблағлар йўналтириляпти.

Президентимиз 3 апрель куни коронавирус пандемияси келтириб чиқарган инқирозга қарши курашиш шароитида тадбиркорликни қўллаб-қувватлаш масалалари бўйича ўтказган видеоселектор йиғилишида халқимизга яна бир марта мурожаат қилиб, жумладан, шундай деди: “Ишонтириб айтаманки, коронавирус тарқаб кетмаслиги учун давлат барча чораларни кўради. Аммо шу синовли дамларда ҳар бир ўзбекистонлик, ҳар бир идора, жамоатчилик вакиллари бир мушт бўлиб ҳаракат қилишимиз керак. Касалликни маҳалламизга, уйимизга, оиламизга олиб кирмаслик учун, энг аввало, ўзимиз масъулмиз”.

Тарихдан маълумки, буюк табиб Ибн Сино бобомиз ҳам шу каби ҳолатлар, яъни эпидемия вақтида биринчи чора сифатида одамларни уйида қолишга, жамоат жойларда йиғилмаслик, бозор ва масжидларни вақтинча ёпиш, мулоқотлардан тийилишга чақирган. Бу тавсиялар бугунги кунда ҳам ўз долзарблигини йўқотмаган.

Чиндан ҳам, соғлиқни сақлаш соҳаси мутахассислари бу касаллик шахсий гигиенага риоя этмаслик, инсонларнинг ўзаро мулоқоти орқали юқиши ҳақида огоҳлантириб, инфекция занжирини ижтимоий яккаланиш орқали узишга чақирмоқда. Шу боис юртимизда карантин эълон қилинди. Шунингдек, пойтахтимиз, Нукус шаҳри ва вилоятлар марказида транспорт воситаларининг ҳаракати чекланди. Зарурат юзасидангина кўчага чиқиш, шунда ҳам юзга ниқоб тақиш, қўлга бир марталик қўлқоп кийиш тавсия этиляпти.

Албатта, мамлакатимизда барча соҳага бирдек эътибор қаратилмоқда. Президентимиз томонидан қабул қилинган “Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида”ги Фармон биз, тадбиркорлар учун алоҳида ғамхўрлик бўлди.

Унга кўра, коронавирус инфекциясига қарши курашиш бўйича тиббиёт ва карантин муассасалари қурилиши учун зарур бўлган қурилиш материаллари, шунингдек, улар фаолият кўрсатиши учун зарур товарлар 2020 йил 31 декабргача божхона тўловларидан, жумладан, қўшилган қиймат солиғидан озод этилди. Коронавирус инфекциясини аниқлаш бўйича экспресс-тестларни олиб киришда улар учун божхона расмийлаштируви йиғими ундирилмайди. Бу фақат тиббиёт йўналишида тақдим этилаётган енгилликлар холос. Иқтисодиёт тармоқлари, аҳолини ижтимоий муҳофаза қилиш йўналишларида тақдим этилаётган имтиёзлар кўлами эса янада кенг.

Ҳаёт эса ўз ўзанида давом этаётир. Юзага келган қийинчиликка қарамасдан, ҳамма касб эгалари ўз юмуши билан банд. Шифокорлар соғлиғимиз учун қайғураётган бўлса, деҳқон ва фермерлар, тадбиркорлар озиқ-овқат хавфсизлигимизни таъминлаш йўлида меҳнат қилмоқда. Ахир қишлоқ хўжалигида баҳорнинг ҳар дами ғанимат. Вақтни орқага қайтаришнинг эса сира иложи йўқ. Шунинг учун бизнинг Бухородаги BCT (Бухоро пахта-тўқимачилик), Қуйи Чирчиқдаги ТCT (Тошкент пахта-тўқимачилик) кластерларимизнинг 12 минг кишилик жамоаси ишни хавфсизлик ва санитария қоидаларига тўлиқ амал қилган ҳолда ташкил этиб, экин майдонларига тўлиқ чигит экиб бўлишди.

Яна бир бор таъкидлаймиз, эпидемиологик ҳолатнинг яхши томонга ўзгариши фақат ўзимизга, тиббий маданиятимизга боғлиқ. Соғлом турмуш тарзига ҳамда белгиланган карантин талабларига қатъий амал қилсак, албатта, ушбу офатни енгиб, ундан беталафот ўтамиз. Зотан, юксак тиббий маданият саломатликнинг мустаҳкам қалқонидир.

Муртазо РАҲМАТОВ,

Олий Мажлис Сенати аъзоси.