Қашқадарё ва Андижон вилоятларида фуқароларнинг номига ажратилган имтиёзли кредит маблағларини қўлга киритган шахслар аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, Бош прокуратура ҳузуридаги Департаментнинг Китоб тумани бўлими томонидан терговга қадар текширув ўтказилган. Унда ҳудудий тижорат банки филиали бошқарувчиси собиқ ўринбосари О.Х. «В.» фермер хўжалиги раҳбари Б.Р. билан ўзаро тил бириктириб, 6 нафар фуқаронинг номига ажратилган 163 млн сўм имтиёзли кредит маблағини «В.» фермер хўжалиги ҳисоб рақамига ўтказиш орқали нақдлаштириб олгани аниқланган.

Шу каби, Департаментнинг Андижон шаҳри бўлими томонидан ўтказилган терговга қадар текширувда фуқаро А.И. ва бошқалар фуқаро С.М.нинг ишончига кириб, унга тижорат банки филиалидан 100 млн сўм имтиёзли кредит ажратиб беришини ваъда қилиб, унинг турмуш ўртоғи ЯТТ Г.М.нинг номига 100 млн сўм имтиёзли кредит ажратилишига эришиб, ушбу маблағларни «Р.Н.» МЧЖ орқали нақдлаштириб олгани аниқланган.

Мазкур ҳолатлар юзасидан Жиноят кодексининг тегишли моддаси билан жиноят ишлари қўзғатилиб, тергов ҳаракатлари ўтказилмоқда.