Фото: Getty Images

Финляндия Шимолий Атлантика альянсининг 31-аъзосига айланди.

Финляндия ташқи ишлар вазири Пекка Ҳаависто НАТОнинг Брюсселдаги қароргоҳида АҚШ Давлат котиби Энтони Блинкенга расмий ҳужжат топшириб, аъзолик жараёнини якунлади.

Блинкен Финляндиянинг НАТОга киришини «тарихий кун» деб атади ва бу Украинада Владимир Путин бошлаган уруш сабаб бўлганини айтди.

«Бу жаноб Путинга раҳмат айтишимиз мумкин бўлган ягона нарса, чунки у Россия агрессияси билан олдини олмоқчи бўлган жараённи янада тезлаштирди», деди Блинкен.

«Бу Финляндияни хавфсизроқ ва НАТОни янада кучли қилади», деди журналистларга НАТО Бош котиби Йенс Столтенберг.

Финляндия Швециянинг НАТО аъзолигига интилади, деди Финляндия президенти Саули Ниинистё.

«Финляндиянинг аъзолиги Швеция аъзолигисиз тўлиқ бўлмайди. Швециянинг НАТОга тезроқ аъзо бўлиши учун иш тинимсиз давом этмоқда», деди Ниинистё баёнотида.

Швеция ва Финляндия 2022 йилнинг май ойида НАТОга кириш учун ариза топширган эди.

Шу йилнинг 21 январь куни Даниянинг Ислом динига қарши «Stram Kurs» партияси раҳбари Расмус Палудан Туркиянинг Стокголмдаги элчихонаси олдида Қуръонни ёқиб юборди. Акция шаҳар маъмурияти билан келишилган ва Палудан бундай чиқиш учун тўловни амалга оширган.

Шундан сўнг, Туркия президенти Режеп Таййип Эрдоған Швеция НАТОга аъзолик масаласида Туркия ёрдамига умид қила олмаслигини айтди.

«Швециядаги, ҳаттоки дипломатик ваколатхонамиз яқинидаги бу нопок ҳаракатлар мусулмонлар, умуман, барча инсонлар, барча ҳуқуқ ва эркинликларни ҳақорат қилиш ҳисобланади», деди Туркия президенти.

Унинг сўзларига кўра, Швеция Шимолий Атлантика альянсига киришда «энди ёрдам кутмаслиги керак», чунки мамлакат «террорчиларни қўллаб-қувватлашда давом этмоқда».

Шу йилнинг 1 апрель куни Режеп Таййип Эрдоған Финляндия аризасини ратификация қилишни маъқуллади.