Фото: СИ

Кеча, 1 сентябрь куни «Ливерпуль» клуби ёзги трансферлар ойнасида энг кўп гапирилган ва энг кутилган трансферни амалга оширди. «Ньюкасл Юнайтед»нинг швециялик ҳужумчиси Александр Исак 150 миллион евро эвазига трансфер қилинди. Таъкидлаш керакки, бу Англия клубларининг бир футболчи учун сарфлаган рекорд сумма ҳисобланади.

Албатта, бу трансфер «Ньюкасл Юнайтед» клубига яхши даромад келтирди. Аммо клуб Исак билан жуда «совуқ» хайрлашди.

Клуб ўзининг расмий сайтида Исакнинг жамоадан кетгани ҳақида қуйидагича хабар берди:

«Ньюкасл Юнайтед ўз ҳужумчиси Александр Исакни Британия футболидаги рекорд нарх эвазига «Ливерпуль»га сотганини эълон қиламиз. Швеция терма жамоаси футболчиси 2022 йилда «Реал Сосьедад»дан жамоамиз сафига қўшилган ва барча мусобақаларда 109 та ўйинда майдонга тушган».

Ушбу баёнотда на футболчининг клубдаги фаолияти учун миннатдорчилик билдирилди, на келгуси фаолиятида омад тиланди. Ҳатто «Ньюкасл Юнайтед» сафида нечта гол ургани ҳам қайд этилмади. Бундан англаш мумкинки, клуб ушбу трансфердан умуман рози эмас.

Дастлаб «Ньюкасл Юнайтед» клуби «мерсисайдликлар»нинг 120 миллион евролик таклифини рад этганди. Бу ҳолат эса Исакнинг кескин норозилигига сабаб бўлди.

Футболчи клуб базасини тарк этди. Ҳатто ўзининг собиқ жамоаси «Реал Сосьедад» сафида машғулотлар ўтказди ва ижтимоий тармоқда «Ньюкасл Юнайтед» раҳбарлари ўз ваъдаларини бажармаётгани, унга номдорроқ клубдан таклиф бўлса, трансфер қилинишга сўз берилгани ҳақида ёзди.

Бунга жавобан «Ньюкасл Юнайтед» қуйидагича изоҳ берди:

«Биз Александр Исакнинг ижтимоий тармоқларда билдирган фикрларини афсус билан қабул қилдик. Шуни маълум қиламизки, унинг клубдан кетиши учун ҳеч бир расмий шахс томонидан ҳеч қандай ваъда берилмаган. Унинг клуб билан шартномаси бор. Биз энг яхши футболчиларимизни сақлаб қолишни хоҳлаймиз, лекин уларнинг истакларини ҳам тинглаймиз. Аммо ҳозирги пайтда уни сотиш имкониятига эга эмасмиз. Биз «Ньюкасл Юнайтед» оиласининг бир қисмига айланган Александрнинг яқин кунларда жамоага қайтиб келишини кутамиз».

Лекин якунда барибир Исак хоҳлаганидек бўлди. «Қарғалар» трансферлар ойнаси якунланиш арафасида уни «Ливерпуль»га сотди. Футболчи учун ҳаммаси яхши кўринади. Аммо Премьер-лига яқин тарихида бундай воқеалар бўлган ва охирида футболчиларнинг ўзи ютқазган ҳолатлар кўп.

Коутиньо воқеаси

2013 йилнинг январь ойида «Ливерпуль» клуби «Интер»дан ёш истеъдод эгаси Филиппе Коутиньони 13 миллион евро эвазига трансфер қилади. У «мерсисайдликлар» сафида ўтказган 5 йилида АПЛнинг энг яхши футболчиларидан бирига айланади. 2016/2017 йилги мавсумга келиб жамоанинг ҳақиқий лидерига айланади.

Шундан сўнг Коутиньога «Барселона», «Бавария», «Манчестер Сити» каби клублар қизиқиш билдира бошлайди. Аммо «Ливерпуль» яқин орада яна грандлар қаторига қайтишни истаб, уни ҳеч кимга сотмаслигини маълум қилади.

«Барселона» дастлаб 78 миллион, сўнгра 97 миллион евролик таклиф билан чиқади, лекин улар рад этилади. Шу пайт Коутиньо «Барселона»га ўтишни қаттиқ хоҳлайди ва раҳбариятдан сотишларини, Каталонияда катта совринлар ютишни исташини айтади.

«Ливерпуль» раҳбарлари жамоага Юрген Клопп келганини, яқин орада катта юлдузлар олиб келинишини ва «мерсисайдликлар» ҳам Европа совринлари учун курашишини айтади. Бироқ бразилиялик футболчи ишонмайди ва «Барселона»га кетиш фикрида туриб олади.

У машғулотларда яхши ишламайди, ҳатто соғлом бўлса ҳам турли баҳоналар билан ўйинларда майдонга тушмайди. Охири «Ливерпуль» уни сотишга мажбур бўлади.

Лекин ушбу трансфердан сўнг, «Ливерпуль»ни эмас, Коутиньонинг ишлари чаппасига кетади. У кетганидан сўнг, «қизиллар»да Роберто Фирмино, Садио Мане ва Муҳаммад Салоҳ триоси шаклланади ва бир неча йил Европани титратaди. Клуб у кетганидан сўнг ўтган яқин 5 йилда Англия Премьер-лигаси, УЕФА Чемпионлар лигаси ва Клублар ўртасидаги Жаҳон чемпионати каби катта турнирларда ғолиб бўлади. Юрген Клопп бошчилигидаги «Ливерпуль» 2018/2019 йилги УЕФА Чемпионлар лигаси ярим финалида Коутиньонинг «Барселона»сини шармандаларча мағлуб этиб, мусобақа финалига йўл олади.

Коутиньо эса «Барселона»га мослаша олмайди. Шу сабаб дастлаб, «Бавария», сўнг «Астон Вилла» каби клубларга ижарага берилади. Ҳатто 2023 йили Қатарнинг «Ал-Духаил» жамоасида ҳам ўйнайди. Ҳозирда у Бразилия чемпионатида тўп суриб келмоқда. Шу тариқа «Ливерпуль»да юрган пайтида Олтин тўпга даъвогар сифатида эътироф этилган футболчи, ўз хоҳишлари қурбонига айланади.

Исак билан ҳам худди шунга ўхшаш воқеа юз бермоқда. Лекин албатта, бу ҳар қандай ҳолатда ҳам «Ливерпуль»да Александрни бахтсиз келажак кутяпти, дегани эмас. Англия футболида Робин ван Перси каби асосий рақиби сафига ўтиб, ўз орзуси рўёбга чиққан футболчилар ҳам бор. Бу ишларнинг охири қандай тугайди? Яқин йилларда билиб оламиз...

Муҳаммадамин Зуҳриддинов,

(«Халқ сўзи»).