Кексаларни эъзозлаш, уларга ҳурмат ва эҳтиром кўрсатиш халқимизга хос азалий қадриятлардан ҳисобланади. Бугунги кунда бу анъана янги мазмун билан бойиб, муҳим аҳамиятга эга тарбия мактабига айланиб бормоқда.

“Нуроний” жамғармаси Васийлик Кенгаши қарорига кўра, мамлакатимиз иқтисодий, ижтимоий ва маданий соҳаларида кўп йиллар давомида самарали меҳнат қилган нуронийлар “Меҳнат фахрийси” кўкрак нишонлари билан тақдирланди. Улар орасида самарқандлик 86 нафар отахону онахонлар ҳам бор.

Самарқанд шаҳрида “Меҳнат фахрийси” кўкрак нишонларини топширишга бағишланган тадбир бўлиб ўтди. “Кексалар ҳафталиги” доирасида ташкил қилинган ушбу тадбирда фидойи, ташаббускор ҳамда ҳаёт йўли ёшлар учун ибрат бўладиган нуронийлар меҳнати эътироф этилди.

Тадбирда вилоят ҳокими вазифасини бажарувчи Адиз Бобоев иштирок этиб, фахрийларни қутлади. Нуронийларнинг ҳаёт тажрибаси ва меҳнати ёшлар учун намуна эканини таъкидлаб, уларга миннатдорлик билдирди.

— Кексаларимиз ҳар бир соҳада фаоллик кўрсатиб, жамият тараққиётига ҳисса қўшиб келмоқда. Уларнинг дуоси ва фаол иштироки барча ишларимизга руҳ ва куч бағишлайди, — деди Адиз Бобоев.

Тадбирда кексаларни эъзозлаш, уларга ҳурмат ва эҳтиром кўрсатиш масаласи давлат сиёсатининг устувор йўналишларидан бирига айлангани қайд этилди.

Абдулазиз ЙЎЛДОШЕВ

«Халқ сўзи».