АҚШ қуролли кучлари яқин вақт ичида Лотин Америкасида наркокартелларга қарши кураш доирасида ер усти нишонларига зарбалар йўллашни бошлайди. Бу ҳақда АҚШ президенти Дональд Трамп маълум қилган.

— Бу одамлар 200 мингдан ортиқ инсонни ўлдирган. Амалда, фақат ўтган йили 200 мингдан ортиқ одамни ўлдиришган. Бу рақамлар пасаймоқда. Пасайишига сабаб — бизнинг зарбаларимиз. Энди биз ер усти объектларига ҳам зарба беришни бошлаймиз. Ерда бу анча осон. Уларнинг қандай йўналишларда ҳаракатланишини биламиз. Улар ҳақида ҳамма нарсани биламиз. Қаерда яшашларини ҳам биламиз. Ёвуз одамлар қаерда яшашини биламиз ва тез орада бунинг устида иш бошлаймиз, — деди Трамп.

Шунингдек, Трамп АҚШ қуролли кучлари зарбаларни фақат Венесуэла ҳудудидагина эмас, балки бошқа давлатларда ҳам амалга ошириши мумкинлигини таъкидлади.

— Эшитишимча, Колумбия кокаин ишлаб чиқаради. У ерда кокаин ишлаб чиқарадиган заводлар бор, тушуняпсизми? Кейин улар бу кокаинни бизга сотади. Биз бундан «жуда миннатдормиз». Ҳа, ким бўлмасин — шу иш билан шуғулланаётган ва уни мамлакатимизга сотаётган ҳар қандай шахс зарба остида бўлади, — деди у.