Фото: Халқ сўзи

Фарғона шаҳрида Корея Республикасининг “Posco International Textile” компанияси томонидан ўтган йили бунёд этилган Ёшлар таълим маркази қошида корейс тили ўқитиш маркази фаолият бошлади.

Ўқув марказининг тантанали очилиш маросимида Фарғона вилояти ҳокимлиги, халқаро ҳамкорлик ва таълим соҳаси масъуллари, ўқувчи-ёшлар ҳамда кенг жамоатчилик вакиллари қатнашди.

Шунингдек, тадбирда Корея Республикасининг мамлакатимиздаги Фавқулодда ва мухтор элчиси Ким Хи Санг иштирок этди.

Таъкидланганидек, сўнгги йилларда Фарғона вилояти ва Корея Республикаси ўртасида ҳар томонлама ҳамкорлик алоқалари ривожланиб бормоқда. Тадбиркорлик, инвестициялар жалб этиш, таълим ва соғлиқни сақлаш, маданий ҳамкорлик доирасидаги дўстона муносабатлар бугун сифат жиҳатдан янги босқичга кўтарилди.

— Ҳозирда рус ва инглиз тилини мукаммал биламан, — дейди Фарғона шаҳридаги хорижий тилларни ўқитишга ихтисослашган 2-умумтаълим мактабининг 9-синф ўқувчиси Кристина Чен. —Келажакда хорижда ўқишни мақсад қилганман. Шу боис ушбу марказда корейс тилини қунт билан ўрганишга киришдим.

Айтиш жоиз, марказга 13 ёшдан юқори бўлган ўғил-қизлар қабул қилиниб, уларга 4 ойлик бепул ўқув курслари ташкил этилади. Бугунги кунда бу ерда 50 нафар тингловчи таълим олмоқда.

Ботир МАДИЁРОВ, “Халқ сўзи”.