Сенатнинг Суд-ҳуқуқ масалалари ва коррупцияга қарши курашиш қўмитаси раиси Абдулҳаким Эшмуратов бошчилигидаги ишчи гуруҳ Фарғона вилояти маҳаллаларида хавфсиз муҳитни шакллантириш, криминоген вазиятни барқарорлаштириш, ижтимоий профилактика тизимини кучайтириш ҳамда коррупция, шу жумладан маиший коррупцияга қарши курашиш борасида амалга оширилаётган ишлар ҳолатини ўрганди.

Ўрганишлар давомида вилоятдаги ҳуқуқни муҳофаза қилиш органлари, мутасадди ташкилотлар, «маҳалла еттилиги» аъзолари, маҳалла фаоллари ҳамда жамоатчилик вакиллари иштирокида жойлардаги ҳолат таҳлил қилинди.

Хусусан, профилактик чоралар самарадорлигини ошириш, аҳоли билан яқин мулоқотни кучайтириш, жиноятчиликка сабаб бўлаётган омилларни бартараф этиш, давлат хизматларини кўрсатишда очиқлик ва жавобгарликни таъминлаш, шунингдек, маиший коррупция ҳолатларининг олдини олиш масалаларига алоҳида эътибор қаратилди.

Шу билан бирга, ишчи гуруҳ аъзолари Қўқон деҳқон бозори, Марғилон деҳқон бозори ва бир қатор савдо мажмуаларида бўлиб, бозор фаолиятида рақамлаштириш жараёнлари билан танишди. Бозорлар фаолиятини рақамлаштириш орқали шаффофликни таъминлаш, маиший коррупция ҳолатларининг олдини олиш ҳамда тадбиркорлар учун қулай ишбилармонлик муҳитини яратиш бўйича тегишли тавсия ва кўрсатмалар берилди.

Шу билан бирга, сенатор халқ депутатлари Фарғона вилояти Кенгашининг навбатдаги ўн тўртинчи сессиясида ҳам иштирок этди. У ўз чиқишида ҳудудда ҳуқуқбузарликларнинг олдини олиш ва криминоген вазиятни барқарорлаштириш бўйича амалга оширилган ижобий ишларга эътибор қаратди.

Шунингдек, «маҳалла еттилиги» фаолиятида йўл қўйилган айрим камчилик ва муаммолар танқидий таҳлил қилиниб, уларни бартараф этиш юзасидан аниқ вазифалар белгилаб берилди.