Фото: Халқ сўзи

Фарғона вилояти ҳокими Хайрулло Бозоров бошчилигидаги делегациянинг Туркияга ташрифи доирасида Истанбул шаҳрида “Terminal Yapı” компаниялар гуруҳи бошқарув кенгаши раиси Мехмет Делимоллаоглу билан учрашув бўлиб ўтди. Унда Фарғона халқаро аэропортини давлат-хусусий шериклик асосида модернизация қилиш ва бошқариш масаласи муҳокама қилинди.

Айни пайтгача дунё бўйлаб қирқта аэропортнинг қурилиши ва модернизациясида иштирок этган “Terminal Yapı” компаниялар гуруҳи Фарғона халқаро аэропортини бошқарувга қабул қилиб, икки босқичда инвестиция лойиҳасини амалга ошириш, дастлаб қўниш йўли қопламаси ва электр тизимини янгилаш, мавжуд терминални реконструкция қилиш ва кенгайтириш, иккинчи босқичда қўниш йўлагини кенгайтириш ҳамда янги терминал қуриш, беш йил муддатда аэропортда йиллик йўловчилар оқимини 3 миллион нафарга етказишни режалаштирмоқда.

Шунингдек, лойиҳа доирасида аэропортда 200 тонналик совиткичли мева-сабзавот сақлаш омбори ҳамда замонавий юк терминали барпо этилиши ҳам кўзда тутилган. Эзгу ташаббус доирасида Фарғонада халқаро авиация соҳасида малакали мутахассислар тайёрлаш таълим маркази фаолиятини йўлга қўйиш ҳам мақсад қилинган.

Ботир Мадиёров, «Халқ сўзи».