ФАО Тошкентда Наврўз ва Халқаро ўрмонлар кунига бағишланган байрам тадбирини ўтказди

18:09 15 Март 2023 Жамият
737 0

Фото: Халқ сўзи

15 март куни Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) нинг Ўзбекистондаги ваколатхонасида Наврўз байрами ва Халқаро ўрмонлар кунига бағишланган тантанали тадбир бўлиб ўтди. Тадбирда вазирлик ва идоралар, халқаро ташкилотлар вакиллари иштирок этди.

2003 йилдаги номоддий маданий меросни муҳофаза қилиш тўғрисидаги Конвенцияга мувофиқ, Наврўз 2009 йилда инсониятнинг номоддий маданий мероси рўйхатига киритилган. 2010 йилда БМТ Бош Ассамблеяси 21 мартни «Халқаро Наврўз куни» деб эълон қилиб, ушбу байрамни нишонлаётган аъзо давлатларнинг у билан боғлиқ маданият ва анъаналарни сақлаш ва ривожлантириш борасидаги саъй-ҳаракатларини қутлади. БМТ Бош Ассамблеясининг резолюцияси аъзо давлатларни Наврўз ҳақида хабардорликни оширишга ва ҳар йили баҳорги тенгкунликни нишонлаш учун тадбирлар ташкил этишга чақиради. Наврўз ФАО учун алоҳида аҳамиятга эга, чунки бу қадимий байрам қишлоқ хўжалиги мавжуд бўлганидан бери нишонланиб келинмоқда ва у баҳор келиши ҳамда қишлоқ хўжалиги ишларининг бошланишини англатади.

Яна бир муҳим сана - Халқаро ўрмонлар куни БМТ бош Ассамблеяси томонидан 2012 йилда барча турдаги ўрмонларнинг аҳамияти тўғрисида кенг жамоатчилик хабардорлигини ошириш мақсадида эълон қилинган. Ҳар йили ушбу кунда мамлакатларга ободонлаштириш ва атроф-муҳитни муҳофаза қилиш билан боғлиқ тадбирларни ташкил этиш бўйича маҳаллий, миллий ва халқаро тадбирларни амалга ошириш таклиф этилади. 2023 йилдаги Халқаро ўрмонлар кунининг мавзуси «Ўрмонлар ва саломатлик».

Шу муносабат билан ушбу иккита муҳим санани нишонлаш доирасида ФАОнинг Ўзбекистондаги ваколатхонаси бир қатор ҳамкорлар билан биргаликда кўчат экиш тадбирини ташкил этмоқда. Таъкидлаш жоизки, ҳудудларни ободонлаштириш ва атроф-муҳитни соғлом сақлаш давлатимиз раҳбари ташаббуси билан амалга оширилаётган «Яшил Макон» миллий дастурининг мақсад ва вазифаларига ҳамоҳангдир.

Тадбирда ўрмонлар, уларни барқарор бошқариш ва ресурслардан фойдаланиш иқлим ўзгаришига қарши курашиш, ҳозирги ва келажак авлодлар истиқболи ва фаровонлигига ҳисса қўшишда муҳим аҳамият касб этиши таъкидланди. Ўрмонлар қашшоқликка қарши курашда ва барқарор ривожланиш мақсадларига эришишда ҳам ҳал қилувчи роль ўйнайди. Бироқ, бу бебаҳо экологик, иқтисодий, ижтимоий ва тиббий хусусиятларга қарамай, ўрмонлар бутун дунёда ёнғинлар, зараркунандалар, қурғоқчилик ва режасиз кесилиши натижасида жиддий хавф остида қолмоқда.

Глобал экологик жамғарма кўмагида ФАО Ўзбекистонда «Ўзбекистоннинг тоғ ва водий ҳудудларида ўрмонларни барқарор бошқариш» лойиҳасини амалга оширмоқда. Лойиҳа доирасида Сирдарё, Қашқадарё ва Наманган вилоятларида жойлашган ҳудудларда ўрмонларни барқарор бошқариш, ўрмон ресурсларидан оқилона фойдаланиш, ўрмонларнинг маҳсулдорлиги ва экологик функцияларини сақлаш, биологик ва ландшафт хилма-хиллиги тамойилларини самарали амалга ошириш ишлари олиб борилмоқда. Бундан ташқари, ободонлаштириш ва кўкаламзорлаштириш, ўрмонларни барқарор бошқариш ва ўрмон хўжалигида гендер тенглигини таъминлаш жараёнларига ахборот-коммуникация технологияларини жорий этишга алоҳида эътибор қаратилмоқда.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?

Кўп ўқилганлар

Янгиликлар тақвими

Кластер