Эрон президенти Масъуд Пезешкиан Бирлашган Миллатлар Ташкилоти Бош Ассамблеясида ўз мамлакатининг халқаро муносабатларида “амалий“ бўлим очишни хоҳлашини ва Теҳрон ядровий дастур бўйича Ғарб билан мулоқот қилишга тайёрлигини айтди.

Сешанба куни БМТнинг дунё етакчиларининг йиллик йиғилишидаги биринчи нутқида Пезешкиан Исроилни Ғазодаги геноцид ва ваҳшийликлари, инсониятга қарши жиноятлари учун қаттиқ танқид қилди.

“Мен ўз мамлакатимнинг янги даврга кириши учун мустаҳкам пойдевор қўйишни мақсад қилганман, уни ривожланаётган глобал тартиботда самарали ва конструктив рол ўйнаши учун ҳаракатдаман. Биз ҳамма учун тинчликка интиламиз ва ҳеч қайси давлат билан тўқнаш келиш ниятимиз йўқ. Эрон урушга қарши ва Украинадаги ҳарбий можарони зудлик билан тўхтатиш зарурлигини таъкидлайди ”, — деди Пезешкиан.

“Биз 2015 йилги ядровий келишув иштирокчилари билан ҳамкорлик қилишга тайёрмиз. Агар келишув мажбуриятлари тўлиқ ва виждонан бажарилса, бошқа масалалар бўйича мулоқот давом этиши мумкин”, деди у.

Пезешкиан тўғридан-тўғри Америка халқига мурожаат қилар экан, Эроннинг бир қатор норозиликлари, жумладан, АҚШ томонидан Эронга нисбатан қўлланилган санкциялар ва 2020 йилда собиқ президент Дональд Трамп даврида Эрон генерали Қосим Сулаймонийнинг АҚШ дрон ҳужумида ўлдирилгани каби бир қатор эътирозларни санаб ўтди.

Трамп бошчилигидаги АҚШ 2018 йилда Теҳрон ва дунёнинг олтита қудратли давлатлари ўртасида тузилган 2015 йилги ядровий битимдан воз кечди ва Эронга нисбатан қаттиқ санкцияларни қайта жорий қилди. Ўшандан бери пактни қайта тиклаш бўйича уринишлар муваффақиятсизликка учрайди.

Трамп ўтган ҳафта 2024 йилги президентлик сайловлари учун ўз кампанияси уюштирган тадбирда АҚШ ва Исроил ўртасидаги муносабатлар ҳақида гапирар экан, Трамп ўз президентлиги даврида Исроилни қўллаб-қувватлагани, жумладан, Қуддусни Исроилнинг пойтахти ва Исроилнинг босиб олинган Голан тепаликлари устидан суверенитетини тан олгани ҳақида гапирди. Собиқ президент Исроил учун қилган энг яхши ишларидан бири Эрон ядровий битимини бекор қилганилигини ҳам қўшимча қилганди.

Шунингдек, Пезешкиан Яқин Шарқда давом этаётган можаронинг минтақалашувини кўрмасликни таъкидлаб, Ливанда содир бўлаётган воқеалар ва буларнинг барчасининг сабаби Исроилнинг Ғазога қарши уруши эканлигига урғу берди.