Eron prezidenti Masʼud Pezeshkian Birlashgan Millatlar Tashkiloti Bosh Assambleyasida oʻz mamlakatining xalqaro munosabatlarida “amaliy“ boʻlim ochishni xohlashini va Tehron yadroviy dastur boʻyicha Gʻarb bilan muloqot qilishga tayyorligini aytdi.

Seshanba kuni BMTning dunyo yetakchilarining yillik yigʻilishidagi birinchi nutqida Pezeshkian Isroilni Gʻazodagi genotsid va vahshiyliklari, insoniyatga qarshi jinoyatlari uchun qattiq tanqid qildi.

“Men oʻz mamlakatimning yangi davrga kirishi uchun mustahkam poydevor qoʻyishni maqsad qilganman, uni rivojlanayotgan global tartibotda samarali va konstruktiv rol oʻynashi uchun harakatdaman. Biz hamma uchun tinchlikka intilamiz va hech qaysi davlat bilan toʻqnash kelish niyatimiz yoʻq. Eron urushga qarshi va Ukrainadagi harbiy mojaroni zudlik bilan toʻxtatish zarurligini taʼkidlaydi ”, — dedi Pezeshkian.

“Biz 2015-yilgi yadroviy kelishuv ishtirokchilari bilan hamkorlik qilishga tayyormiz. Agar kelishuv majburiyatlari toʻliq va vijdonan bajarilsa, boshqa masalalar boʻyicha muloqot davom etishi mumkin”, dedi u.

Pezeshkian toʻgʻridan-toʻgʻri Amerika xalqiga murojaat qilar ekan, Eronning bir qator noroziliklari, jumladan, AQSH tomonidan Eronga nisbatan qoʻllanilgan sanksiyalar va 2020-yilda sobiq prezident Donald Tramp davrida Eron generali Qosim Sulaymoniyning AQSH dron hujumida oʻldirilgani kabi bir qator eʼtirozlarni sanab oʻtdi.

Tramp boshchiligidagi AQSH 2018-yilda Tehron va dunyoning oltita qudratli davlatlari oʻrtasida tuzilgan 2015-yilgi yadroviy bitimdan voz kechdi va Eronga nisbatan qattiq sanksiyalarni qayta joriy qildi. Oʻshandan beri paktni qayta tiklash boʻyicha urinishlar muvaffaqiyatsizlikka uchraydi.

Tramp oʻtgan hafta 2024-yilgi prezidentlik saylovlari uchun oʻz kampaniyasi uyushtirgan tadbirda AQSH va Isroil oʻrtasidagi munosabatlar haqida gapirar ekan, Tramp oʻz prezidentligi davrida Isroilni qoʻllab-quvvatlagani, jumladan, Quddusni Isroilning poytaxti va Isroilning bosib olingan Golan tepaliklari ustidan suverenitetini tan olgani haqida gapirdi. Sobiq prezident Isroil uchun qilgan eng yaxshi ishlaridan biri Eron yadroviy bitimini bekor qilganiligini ham qoʻshimcha qilgandi.

Shuningdek, Pezeshkian Yaqin Sharqda davom etayotgan mojaroning mintaqalashuvini koʻrmaslikni taʼkidlab, Livanda sodir boʻlayotgan voqealar va bularning barchasining sababi Isroilning Gʻazoga qarshi urushi ekanligiga urgʻu berdi.