Ўзбекистон Бош консулхонаси ходимлари кўмагида Россиянинг Екатеринбург шаҳрида мушкул аҳволда қолган ватандошларимиз ватанга қайтарилди. Бу ҳақида «Дунё» ахборот агентлиги хабар берди.

Маълум бўлишича, ҳамюртимиз С.Л. Екатеринбург шаҳрига турмуш ўртоғи билан вақтинча ишлаш мақсадида келган қизи М.О.нинг туғруқхона билан боғлиқ муаммоларини ҳал қилиб беришни сўраб, Ўзбекистон Бош консулхонасига мурожаат қилган.

Мазкур мурожаатга асосан Бош консулхона ҳузуридаги «Аёллар кенгаши» раиси томонидан ушбу ҳолат ҳар томонлама ўрганиб чиқилган. Маълум бўлишича, М.О. Екатеринбург шаҳрида турмуш ўртоғи, онаси ва вояга етмаган фарзанди билан яшаб келган. Турмуш ўртоғи оилавий келишмовчилик сабаб уларни ташлаб кетган.

«Маҳаллий шифокорлар билан олиб борилган маслаҳатлар натижасида бўлғуси онанинг ҳомиласига ва Ўзбекистонга қайтиши учун таҳдидлар йўқлиги маълум бўлди», — дейилади хабарда.

Бош консулхона ходимлари ва Свердловск вилоятидаги фаол ватандошлар кўмагида ҳамюртларимизнинг доимий яшаш манзилига етиб олиши учун «Екатеринбург-Тошкент» йўналишидаги самолётга чипта харид қилиб берилган. Шунингдек, Ўзбекистон дипломатлари мазкур оилани 3 май куни Екатеринбург шаҳридаги «Колсово» халқаро аэропортидан Тошкент шаҳрига кузатиб қўйган.