Ўзбекистон ҳудудида 27 январь куни турли об-ҳаво шароитлари кузатилиши кутилмоқда. Бир қатор ҳудудларда шамолнинг кучайиши ва айрим жойларда туман пайдо бўлиши эҳтимоли мавжуд.

Пойтахтимизда ҳаво бироз булутли бўлиб, ёғингарчилик бўлмайди. Шамол шарқдан 3-8 м/с тезликда эсади. Ҳаво ҳарорати кечаси 0-2 даража совуқ, кундузи эса 9-11 даража илиқ бўлиши кутилмоқда.

Қорақалпоғистон ва Хоразмда ҳаво бироз булутли бўлиб, ёғингарчилик кутилмаяпти. Бир қатор жойларда туман тушиши эҳтимоли бор. Шамолнинг тезлиги шарқдан 7-12 м/с бўлиб, баъзи ерларда 13-18 м/с гача етмоғи мумкин. Ҳарорат кечаси 5-10 даража совуқ, кундузи 0-5 даража илиқни ташкил этади.

Бухоро ва Навоий вилоятларида ҳаво бироз булутли бўлиб, ёғингарчилик қайд этилмайди. Айрим ҳудудларда туман пайдо бўлиши эҳтимоли сақланиб қолмоқда. Шамол шарқдан 7-12 м/с тезликда эсиб, баъзи жойларда 13-18 м/с гача кучайиши мумкин. Ҳарорат кечаси 0-5 даража совуқ, кундузи 7-12 даража илиқ бўлади. Навоийнинг шимолий ҳудудларида кечаси 3-8 даража совуқ, кундузи 3-8 даража илиқ бўлади.

Тошкент, Сирдарё, Самарқанд ва Жиззах вилоятларида ҳаво бироз булутли, лекин ёғингарчилик кутилмаяпти. Бир неча ҳудудларда туман тушиши мумкин. Шамолнинг тезлиги шарқдан 7-12 м/с бўлиб, айрим ерларда унинг кучайиши мумкин. Ҳарорат кечаси 3 даража совуқдан 2 даража илиққача, кундузи эса 7-12 даража илиқни ташкил этади.

Қашқадарё ва Сурхондарё вилоятларида ҳаво очиқ бўлиб, ёғингарчилик бўлмайди. Шамол шарқдан 7-12 м/с тезликда эсади. Ҳаво ҳарорати кечаси 0-5 даража илиқ, кундузи эса 10-15 даража илиқ бўлади.

Андижон, Наманган ва Фарғона вилоятларида ҳаво бироз булутли бўлиб, ёғингарчилик кутилмаяпти. Бир неча жойларда туман тушиши мумкин. Шамол шарқдан 5-10 м/с тезликда эсиб, баъзи ерларда кучайиши мумкин. Ҳаво ҳарорати кечаси 0-5 даража совуқ, кундузи эса 6-11 даража илиқни ташкил этади.

Тоғли ҳудудларда ҳаво бироз булутли бўлиб, айрим жойларда ёғингарчилик бўлиши, туман тушиши эҳтимоли бор. Тошкент ва Наманган вилоятларининг тоғли ҳудудларида қор кўчиши хавфи сақланиб турибди. Шамолнинг тезлиги шарқдан 7-12 м/с бўлиб, айрим ерларда 13-18 м/с гача кучайиши мумкин. Ҳаво ҳарорати кечаси 0-5 даража совуқ, кундузи эса 2-7 даража илиқни ташкил этади.

27 январь куни мамлакат бўйлаб айрим ҳудудларда шамолнинг кучайиши ва туман кузатилиши кутилмоқда. Фуқароларга, айниқса, тоғли ҳудудларда хавфсизликка риоя қилиш ва транспорт воситаларини бошқаришда эҳтиёткорликка амал қилиш тавсия этилади.