Президент Шавкат Мирзиёев раҳнамолигида “Инсон қадри учун” деган эзгу тамойил асосида олиб борилаётган ислоҳотлар нафақат юртимизда, балки дунёнинг бир қанча нуқталарида ҳам юракларга ҳаётдан розилик, тақдирдан миннатдорлик олиб кираётганини ҳаяжонсиз гапирмай бўлмайди.

Биргина “Бўстон” сиҳатгоҳи мисолида олсак, бу масканда қанчадан-қанча беором қалбларга таскин берилди. Минглаб одамлар уруш оловлари ичидан оромгоҳимизга олиб келиниб, инсонпарварлик ва бағрикенглик кўрсатилди. Кейинги йилларда бир эмас, беш марта амалга оширилган “Меҳр” ёрдамларини эслайлик. Кўрсатилган ғамхўрлик учун юзлаб инсонлар миннатдорлик билан дуо қилмоқда. Улар бир кечада бошларида бомба портлаб, қулоқлари олдидан ўқ визиллаб ўтиб турган вазиятдан тинч ва осуда ҳаётга қайтдилар.

Фаластинлик оналар ва болаларга кўрсатаётган саховат ва ғамхўрликни бутун дунё тан олиб турибди. Улар ҳам табассум қилишга ҳақли. Мана, тўққиз ойдирки, улар ҳаловатда ҳаёт кечирмоқда. Ватанимизда улар учун барча шароитлар яратиб берилмоқда. Бу тинчликсевар Ўзбекистоннинг бутун жаҳонга қарата “Дунёга тинчлик керак!” – дея айтган даъватидир.

Бир майизни қирқ бўлиб еган халқмиз. Бағрикенглик, инсонпарварлик қон-қонимизга сингиб кетган. “Бўстон санаторийси”да бу қадриятлар миллатимиз шаъни каби эъзоз топиши, бунга ҳеч ким бефарқ бўлмаслигига ҳаракат қиламиз.

Фарида АКБАРОВА,

Ўзбекистон касаба уюшмалари Федерацияси тасарруфидаги

“Бўстон санаторийси” масъулияти чекланган жамияти директори,

Халқ депутатлари Тошкент вилояти Кенгаши депутати.