Дам олиш кунлари Украина ҳарбийлари Россиянинг Саратов вилоятидаги нефтни қайта ишлаш заводига дрон ҳужумлари уюштирди. Саратов губернатори якшанба куни бир киши ҳалок бўлганини, бир неча турар-жой ва саноат объекти зарар кўрганини маълум қилди, аммо завод ҳақида тўғридан-тўғри айтмади.

Украина армияси эса Суми вилоятидаги бир қишлоқни Россия қўшинларидан озод этганини ва Безсаливкадаги рус кучларини “тозалаганини“ билдирди. Бош штаб маълумотича, жангларда 18 нафар рус ҳарбийси йўқ қилинган.

Одесса вилоятида портламай қолган мина ва снарядлар туфайли икки соҳилда сузиш тақиқланганига қарамай, уч нафар сузувчи ҳалок бўлди. Қора денгиз соҳиллари узоқ йиллардан бери ёзги сайёҳлар учун машҳур бўлса-да, тўлиқ миқёсли урушдан бери миналар хавфи сақланиб қолмоқда.

Шанба куни Россия Херсон вилоятида автобусга дрон билан ҳужум қилди. Украина расмийларига кўра, камида икки киши ҳалок бўлган, 16 киши яраланган. Ҳужумга жавоб бериш жараёнида яна бир дрон автобусга урилиб, уч нафар полиция ходими яраланган. Шунингдек, Запорожье вилоятидаги ҳужумда уч киши вафот этди.

Украина ҳарбий-ҳаво кучлари охирги кунларда йўлга қўйилган 47 та рус дронидан 16 тасини уриб туширган, 31 таси эса 15 та нуқтадаги нишонларни урган. Россия Мудофаа вазирлиги бир кечада 97 та, эрталаб эса яна 21 та украин дронини уриб туширганини билдирди.

Европа Трамп-Путин музокаралари олдидан Украинага ёрдам позициясини мустаҳкамламоқда

Украина президенти Владимир Зеленский Россияга ҳудуд бериш ҳақидаги ҳар қандай таклифни рад этишини яна бир бор билдирди.

Дональд Трамп Оқ уйга қайтганидан кейин 24 соат ичида урушни тугатишга ваъда берган ва жума куни Путин билан Аляскада учрашиш ниятини билдирган. Унга кўра, келишув яқин. Хабарларга кўра, Трамп Зеленскийни ҳам Аляскага таклиф қилишга тайёр, аммо ҳозирча расмий тасдиқ йўқ. Путин эса Украина раҳбари билан учрашиш учун муайян шартлар кераклигини таъкидлаган.

Буюк Британия, Франция, Германия, Италия, Польша ва Финляндия раҳбарлари Урсула фон дер Ляйен билан биргаликда қўшма баёнот бериб, Украинани қўллаб-қувватлаш ва Россияга босимни давом эттириш зарурлигини билдиришди.

«The Wall Street Journal» ёзишича, европалик расмийлар АҚШ вице-президенти Ж.Д. Венс билан учрашувда тинчлик бўйича қарши таклифни тақдим этган. Унда ҳар қандай ҳудудий келишув қатъий хавфсизлик кафолатлари билан бўлиши шартлиги таъкидланган.