Видеодан кадр

Самарқанд вилояти Паяриқ туманида аёл чақалоғини дунёга келтириб, туғуруқхона ҳожатхонасининг чиқинди қутисига ташлаб кетгани ҳақида хабар берилган эди. Мазкур ҳолат юзасидан қўшимча маълумотлар очиқланди.

Маълум бўлишича, 2025 йилнинг 27 декабрь куни тиббиёт бирлашмасига келган аёл қабзиятдан шикоят қилган ва клизма сўраб мурожаат қилган. Шифокор томонидан текширув ўтказиш ҳамда UTT қилиш таклиф этилган, бироқ бемор бунга рози бўлмаган.

Шундан сўнг аёл муолажа хонасига йўналтирилган. Орадан бироз вақт ўтгач, хонани текширган тиббиёт ходимлари челак ичида қолдириб кетилган чақалоқ мурдасини топган.

Аниқланишича, аёл муолажа жараёнида ҳамширадан уни ёлғиз қолдиришни сўраган ва ўша ерда чақалоғини дунёга келтирган, сўнг тиббиёт муассасасини тарк этган. Челак ичидан топилган чақалоқ тўққиз ойлик, ўғил жинсли бўлган.

Ҳолат аниқлангач, шифохона маъмурияти кузатув камералари орқали аёл шахсини аниқлаган ва ҳуқуқни муҳофаза қилувчи органларга хабар берган. Қайд этилишича, шифохонага қайнонаси ҳамроҳлигида келган аёл тўрт ойлик келин бўлган.

Самарқанд вилояти Ички ишлар бошқармаси ахборот хизмати раҳбари Ҳамидулло Сағдуллаевнинг маълум қилишича, мазкур ҳолат юзасидан тегишли ҳужжатлар расмийлаштирилиб, судга оид тиббий экспертиза тайинланган. Ҳозирда Паяриқ тумани Ички ишлар бўлими ҳузуридаги тергов бўлинмаси томонидан терговга қадар текширув ишлари олиб борилмоқда.