Британия иттифоқчилар томонидан муҳокама қилинаётган режалар асосида Украинага беш йил давомида қўшин киритиш имкониятини кўриб чиқмоқда. Бу ҳақида «The Telegraph» нашри хабар берди.

Унда айтилишича, Украина ҳудудига қўшин киритиш мамлакатга қилиниши мумкин бўлган янги босқиннинг олдини олиши ҳамда Украина армиясини тайёр ҳолатга келтириш ва қайта шакллантиришга ёрдам беради.

Украина ҳудудига киритилиши мумкин бўлган қўшинларнинг аниқ сони ҳақида ҳеч қандай маълумотлар берилмаган.

Буюк Британия ҳамда Франция муҳокама қилаётган мавзулар орасида Европа бошчилигидаги тинчликпарвар кучларни Украина ҳудудига киритиш режаси ҳам бор.

Европа давлатлари расмийларининг фикрича, Украинага қўшин киритиш, биринчи навбатда Россияни тинчлик битимини бузиш, босқинлар содир этиш фикридан қайтаришга қаратилган.

«Европа давлатлари «хоҳловчилар коалицияси» доирасида қуруқликдаги қўшинларни юборишдан ташқари, Украина ҳаво ва денгиз ҳудудини ҳимоя қилишни таъминламоқчи. Бунга эришиш учун қандай чоралар кўрилиши ҳали аниқлаштирилмаган», — деб ёзади «The Telegraph» нашри.