Давлат хавфсизлик хизмати ходимлари томонидан Иқтисодий жиноятларга қарши курашиш департаменти билан ҳамкорликда Буюк Британияга ишга юбориш учун 12 минг АҚШ доллари олган шахсни қўлга туширди. Бу ҳақда ДХХ матбуот хизмати хабар берди.

Маълум қилинишича, масъул ташкилотлар ҳамкорликда ноқонуний миграцияга қарши курашиш йўналишида ўтказилган тезкор тадбирда, Наманган вилоятининг Косонсой шаҳрида яшовчи, 1998 й.т. У.С. қўлга олинган.

У Самарқанд вилоятида истиқомат қилувчи 4 нафар фуқаронинг ишончига кириб, ўзининг мансабдор танишлари орқали уларни Буюк Британия давлатига ишлаш учун юборишга ваъда берган.

Шу тариқа, айбланувчи бунинг учун зарур бўладиган ҳужжатларни расмийлаштириш ҳамда виза олишда ёрдам беришини айтиб, эвазига 12 минг АҚШ доллари олган вақтида ашёвий далиллар билан ушланди.

«Ҳозирда мазкур шахсга нисбатан Жиноят Кодексининг 168-моддаси 3-қисми «а» банди ва 28,211-моддаси 2-қисми «б» банди билан жиноят иши қўзғатилиб, тергов ҳаракатлари олиб борилмоқда», дейилади хабарда.