Жаҳон соғлиқни сақлаш ташкилотининг маълумотларига кўра, дунёда ҳар 1000-1500 нафар боладан биттаси туғма танглай ва лаб кемтиги билан туғилади. Бу хасталиклар келиб чиқишининг сабаблари кўп, лекин асосий омил – ирсий мойилликдир. 

Юртимизда ҳам танглай ва лаб кемтиги болаларда энг кўп учрайдиган туғма аномалиялардан ҳисобланади. Шунинг учун давлатимиз томонидан ушбу хасталикларга чалинган жажжи беморларни даволаш бўйича барча зарур чоралар кўрилмоқда. Муҳими, деярли барча муолажалар бепул амалга ошириляпти.

Мана бугун яна бир шундай хайрли ташаббусга старт берилди.

Аниқроғи, "Операция Улыбка" хайрия акцияси доирасида машҳур пластик жарроҳ, доктор Ҳасан Баиев туғма танглай ва лаб кемтиги бўлган болаларда бепул жарроҳлик амалиётларини бажариш мақсадида тиббий кўрик ўтказиш учун юртимизга ташриф буюрди.

Ҳасан Баиев — 40 йиллик тажрибага эга россиялик ва америкалик пластик жарроҳ. Турли йилларда АҚШ, Япония ва Англияда йил одами деб тан олинган машҳур шифокор 20 йилдан буён хайрия ишлари билан шуғулланиб келади. Ушбу давр мобайнида у 2000 нафарга яқин болаларда бепул жарроҳлик амалиётларини бажарди.

Пойтахтимиздаги Болалар миллий тиббиёт марказида ўтказилаётган мазкур акция аввалида Соғлиқни сақлаш вазири Амрилло Иноятов, доктор Ҳасан Баиев ва марказ раҳбарияти иштирокида беморларнинг ота-оналари билан учрашув бўлиб ўтди.

Унда таъкидланганидек, ҳеч ким эътибордан четда қолмайди, ҳар бир беморга тегишли тавсиялар берилиб, операцияга муҳтож болаларда юқори технологияга асосланган амалиётлар бажарилади.

Шундан сўнг, Ҳасан Баиев беморларни тиббий кўрикдан ўтказишга киришди. Акцияга республикамизнинг барча ҳудудларидан турли ёшдаги беморлар ташриф буюрди.

Масалан, Наманган вилоятидан келган Гулноза Турғунпўлатова – 13 ёшда. Шифокор беморни кўздан кечириб, унда суяк пластик операциясини ўтказиш учун ортодонтик тайёрлаш бўйича кўрсатма берди.

Яна бир бемор – 10 ёшли Ойбек Ғанишеровда лаб кемтиги туфайли фистула пайдо бўлган. Уни бартараф этиш учун болакайда жарроҳлик амалиёти бажариладиган бўлди.

Операция ўтказиладиган беморларнинг рўйхатига сирдарёлик Фаризода Ғайбуллаева ҳам киритилди. Яқиндагина 1 ёшни қарши олган бу қизалоққа лаб кемтиги ва чап томонлама танглай кенгайиши ташхиси қўйилиб, у ҳам жарроҳлик амалиётига тавсия этилди.

Умуман олганда, операциялар учун беморлар қатъий мезонлар асосида саралаб олинмоқда.

Биринчидан, амалиёт учун, энг аввало, ижтимоий муҳтож, кам таъминланган оилалар фарзандлари тавсия этилади.

Иккинчидан, операциядан кейин асоратлар келиб чиқишининг олдини олиш мақсадида қарши кўрсатмалар бўлган беморларда жарроҳлик амалиётлари бажарилмайди. Чунки бундай кўрсатмалар беморнинг реабилитация жараёнига таъсир қилиши мумкин.

Бу – беморларни танлаб олишнинг дастлабки босқичи. Шифокорнинг кейинги ташрифида операция ўтказиладиган беморларнинг якуний рўйхати тузилиб, уларда тегишли амалиётлар бажарилади.

Эътиборлиси, кам инвазив усулдаги операцияларда маҳаллий мутахассислар ҳам иштирок этиб, бу уларнинг малакасини ошириш ва янги даво усулларини ўзлаштириш имконини беради.

Тиббий кўрик эртага ҳам давом этади.