Бугун икки нафар боксчимиз Шаҳобиддин Зоиров (-52 кг) ва Элнур Абдураимов (-63 кг) Токио-2020 Олимпия ўйинларининг медали сари навбатдаги муваффақиятли юришни амалга оширдилар. Ҳар икки боксчимиз ҳам чорак финал учун кечган жангни ажойиб ўтказиб, мухлисларимизнинг кайфиятини кўтаришди. Бу ҳақда МОҚ хабар берди.

Хусусан, боксчимиз Шаҳобиддин Зоиров Токио-2020 Олимпия ўйинларининг навбатдаги кун беллашувларини ғалаба билан бошлаб берди. Вакилимиз Кабо-Верде вакилини мағлуб этиб, чемпионликни ҳимоя қилиш йўлида муҳим қадам ташлади.

Нимчорак финал босқичи доирасидан ўрин олган мазкур беллашув Варела Даниэлга қарши ўтди. Шубҳасиз, тажриба ва маҳорат бобида анча устун бўлган Зоиров баҳсни ўз фойдасига ҳал қилишга муваффақ бўлди.

Шу тариқа, вакилимиз чорак финалга йўл олмоқда. Ярим финал учун кечадиган беллашувда боксчимизга Филиппин ва Жазоир вакиллари ўртасидаги баҳс ғолиби рақиблик қилади.

Токио-2020 Олимпия ўйинларида Элнур Абдураимов ҳам ўзининг иккинчи жангини муваффақиятли ўтказиб, чорак финал йўлланмасини қўлга киритди.

Нимчорак финалда унга тожикистонлик тажрибали боксчи Баҳодур Усмонов рақиблик қилди. Раундлардаги аниқ ва кучли зарбалар якунда ҳакамларнинг баҳоларида акс этди. Шу тариқа Элнур Абдураимов бу беллашувни яққол устунлик билан якунлаб, чорак финалга йўл олди. Ярим финал учун у арманистонлик Ховханнес Бачков қаршилигини синдириши керак.