Венесуэла олий суди мамлакат вице-президенти Делси Родригесга президент ваколатлари ва вазифаларини вақтинча ўз зиммасига олишни топширди.

Таъкидланишича, мазкур қарор хорижий ҳарбий тажовуз оқибатида юзага келган фавқулодда вазиятга жавоб сифатида қабул қилинган. Делси Родригеснинг президент вазифасини бажарувчи этиб тайинланиши институционал барқарорликни сақлаш ҳамда ташқи беқарорлаштириш уринишларига қарамай, Венесуэла суверенитетини қайта тасдиқлашга қаратилган.

Делси Родригес янги давлат раҳбари сифатида қасамёд қилар экан, Венесуэла ҳеч қачон ҳеч кимнинг мустамлакаси бўлмаслигини маълум қилди. У ўз нутқида Николас Мадурони озод қилишни талаб қилди ва АҚШ қўшинлари томонидан олиб кетилган сиёсатчи мамлакатнинг ягона қонуний президенти бўлиб қолишини таъкидлади.

Шунингдек, Родригес Венесуэла ўзини ҳимоя қилишга тайёр эканини, ҳеч кимнинг мустамлакасига айланиш нияти йўқлигини ва давлат суверенитети қатъий ҳимоя қилинишини маълум қилган.

АҚШ президенти «New York Post» газетасига берган интервьюсида, агар Делси Родригес Вашингтон истаган қадамларни ташласа, АҚШ ўз қўшинларини Венесуэлага жойлаштирмаслигини айтган эди.