Бош прокуратура ҳузуридаги Департамент Тошкент шаҳридаги савдо дўконларидан акциз маркасиз тамаки маҳсулотлари сотилаётганини аниқлади. Ҳуқуқбузарлар қўлга олинган. Бу ҳақда Департаментнинг матбуот хизмати маълум қилди.

Хабар қилинишича, Департаментнинг Яккасарой туман бўлими томонидан ўтказилган ўтказилган тезкор тадбирда ЯТТ «А.Н.»га тегишли савдо дўкони сотувчиси Н.А. харидорга 1 қути «R1» номли тамаки маҳсулотини 100 минг сўмга сотган вақтида ушланган. Кейинчалик ушбу савдо дўконидан 50 турдаги 2 минг 535 қути тегишли ҳужжатлари бўлмаган тамаки маҳсулотлари ашёвий далил сифатида олинган.

Сергели туман бўлими томонидан ўтказилган тезкор тадбирда эса «Р-А.» хусусий корхонаси савдо дўконидан 673 қути акциз маркасиз тамаки маҳсулотлари аниқланиб, тегишли тартибда ҳужжатлаштирилган.

«Мазкур ҳолатлар юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда», дейилади хабарда.

Аввалроқ, бир «Исузу» тегишли ҳужжатлари бўлмаган дорларни «аптекачи»га сотмоқчи бўлишгани ҳақида хабар берилганди.