Бош прокуратура ҳузуридаги Департамент энергия ресурсларидан ноқонуний фойдаланиш ҳолатлари фош этилди. Бу ҳақда Департаментнинг матбуот хизмати хабар берди.

Маълум бўлишича, Департаментнинг Бекобод туман бўлими, ИИБ ва ЭТК «Зафар» филиали ходимлари ҳамкорлигида ўтказилган ўтказилган тезкор тадбирда фуқаро Ў.Б. «Б.» МЧЖга қарашли ер майдонидаги сув насосларини ҳисоблагичдан ташқари умумий фойдаланишдаги тармоққа улаб, жами 310,7 миллион сўмлик электр энергиясидан ноқонуний фойдаланганлиги аниқланган.

Бундан ташқари, Бешариқ туман бўлими томонидан ўтказилган терговга қадар текширувда «А.Б.» фермер хўжалиги масъул шахслари хўжалик экин ер майдонини суғоришда жами 99,6 миллион сўмлик электр энергиясидан ноқонуний фойдалангани ҳам фош этилган.

Яна шу каби ҳолат Янгийўл шаҳарида ҳам аниқланган. Ўтказилган терговга қадар текширувда ЯТТ Н.К. «Файзобод» МФЙ ҳудудидаги савдо дўконида кондиционер ва музлаткичларини тижорат мақсадида умумий фойдаланишдаги электр тармоғига яширинча улаб, жами 208,9 миллион сўмлик электр энергиясидан пулини тўламасдан ишлатгани маълум бўлган.

«Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда», дейилади хабарда.

Аввалроқ, Самарқанд шаҳридаги бир МЧЖ Жиноят кодексининг 186-1-моддаси билан айбланаётганди.