Беларусь Республикаси адлия вазирининг биринчи ўринбосари Наталия Филиппова бошчилигидаги делегациянинг Ўзбекистонга ташрифи доирасида жорий йилнинг 22 февраль куни Адлия вазирлигида икки томонлама учрашув бўлиб ўтди.

Учрашув давомида адлия вазири ўринбосари Алишер Каримов томонидан Ўзбекистонда амалга оширилаётган ислоҳотлар, шу жумладан норма ижодкорлиги соҳасидаги ислоҳотлар тўғрисида батафсил маълумот берилди.

Учрашувда Адлия вазирлигининг норма ижодкорлиги жараёнидаги ўрни ва фаолияти, шу жумладан бугунги кундаги қонунчилик ҳужжатлари лойиҳаларини ишлаб чиқиш, уларни ҳуқуқий экспертизадан ва коррупцияга қарши экспертизадан ўтказиш ҳамда норма ижодкорлиги соҳасига жорий этилган «ақлли тартибга солиш» модели, тартибга солиш таъсирини баҳолаш, «тартибга солиш гилотинаси» каби институтларга алоҳида тўхталиб ўтилди.

Учрашув якунида Ўзбекистон ва Беларусь Адлия вазирликлари ўртасида норма ижодкорлиги соҳасида келгусида ўзаро кенг кўламли ҳамкорликни давом эттиришга келишиб олинди.

Беларусь Республикаси делегацияси ташрифи давомида давлат хизматларини кўрсатиш марказларининг самарали фаолияти, адлия органлари тизимида рақамлаштириш ва ҳуқуқий ахборотни тарқатиш борасида амалга оширилган ишлар билан ҳам танишиш ва тажриба алмашиш кўзда тутилган.