Иллюстратив фото

Аввалроқ Тошкент вилояти Бекобод шаҳрида ИИБ биносига олиб кетилган фуқаронинг вафот этгани ҳақида хабар берилган эди. Мазкур ҳолат юзасидан юритилаётган иш доирасида бир нафар ходим қамоққа олинди. Бу маълумотни Бош прокуратура матбуот котиби Ҳаёт Шамсутдинов «Халқ сўзи»га тасдиқлади.

Бекободда ИИБ биносига олиб кетилган фуқаро вафот этди.

Жиноят ишлари бўйича Бекобод шаҳар судида жамоат тартибини бузган ака-ука ИИБга олиб кетилгани ва у ерда фуқаролардан бирининг соғлиғи ёмонлашиб, шифохонада вафот этгани ҳақида хабарлар тарқалди.

Вилоят ИИББ ахборот хизмати томонидан берилган расмий муносабатда марҳумнинг ИИБ биносига кириш йўлагида соғлиги ёмонлашиб ҳушини йўқотгани, у шаҳар шифохонасига олиб борилгани ва кўрикдан ўтказилаётган вақтида вафот этганлиги қайд этилган.

Кейинроқ Ички ишлар вазирлиги матбуот котиби Шоҳруҳ Ғиёсов мазкур ҳолат бўйича қўшимча маълумот бериб, унда воқеа содир бўлган жойларда мавжуд бўлган барча видеоёзувлар олингани, гувоҳлар ҳамда воқеа иштирокчиларнинг кўрсатмалари текширилаётгани ҳамда тегишли судга оид экспертизалар тайинланганини билдирди.

Шунингдек, Олий Мажлиснинг Инсон ҳуқуқлари бўйича вакили (омбудсман) нинг Тошкент вилоятидаги минтақавий вакили марҳумнинг оила аъзолари билан учрашиб, таъзия изҳор қилди ва мазкур ҳолат бўйича Ўзбекистон Республикаси Бош прокуратурасига назорат хати юборди.

Омбудсман прокуратурадан ушбу ҳолатни қонун талаблари доирасида кўриб чиқилиши, воқеанинг барча жиҳатларини очиқ ва адолатли суриштирувини таъминлашни сўраган.