Фото: Видеодан кадр

Хабарингиз бор, жорий йилнинг 1 июнь куни Тошкент шаҳрида текинга ўйинчоқ ва музқаймоқ тарқатилиши ҳақидаги хабарлар ортидан «Ашхобод» боғи ва унинг атроф ҳудудида катта тирбандлик ҳамда тиқилинч юзага келганди.

Шу ва шу каби сабаблар билан эндиликда Ўзбекистондаги оммавий тадбирларга фуқароларни реклама, акция ва бошқа мақсадларда озиқ-овқат, буюмлар ҳамда бошқа маҳсулот ва товар-моддий бойликларни бепул тарқатиш ёки ҳаддан ташқари арзонлаштирилган нархда сотиш орқали жалб қилиш тақиқланди.

Бу ҳақда «Оммавий тадбирларни ўтказишда фуқаролар хавфсизлигини таъминлаш ва жамоат тартибини сақлаш бўйича талабларни кучайтириш тўғрисида»ги ҳукумат қарорида белгиланди.

Ҳужжатга кўра, Миллий гвардия ва ИИВ тегишли вазирлик ва идоралар билан биргаликда ушбу қарорда белгиланаётган талабга оммавий тадбир ташкилотчилари ва оммавий тадбирни ўтказиш объекти маъмурияти томонидан сўзсиз риоя қилиниши устидан назоратни кучайтиради.

Ҳукуматнинг ушбу қарори билан Оммавий тадбирларни ўтказиш қоидаларига тегишли ўзгариш ва қўшимчалар киритилади.

Оммавий тадбирларни ўтказиш қоидалари бузилишига йўл қўйган оммавий тадбир ташкилотчилари ва оммавий тадбирни ўтказиш объекти маъмурияти Маъмурий жавобгарлик тўғрисидаги кодексда белгиланган тартибда жавобгарликка тортилади.

Эслатиб ўтамиз, текинга ўйинчоқ ва музқаймоқ тарқатилиши ҳақидаги хабарлар ортидан «Ашхобод» боғи ва унинг атроф ҳудудида катта тирбандлик ҳамда тиқилинч бўйича боғ директори, унинг ўринбосари ва реклама бўлими бошлиғига 15 сутка қамоқ жазоси берилганди.