Фото: AP

Америка Қўшма Штатлари Исроилдан Ғазо секторига гуманитар ёрдам олиб кетаётган фуқаро полициясига ҳалокатли зарба беришни тўхтатишни талаб қилмоқда. Чунки бу босқинчиларнинг гуманитар карвонларга қуролли ҳужумлари кучайишига сабаб бўлмоқда. Бу ҳақда “Axios” америкалик ва исроиллик уч расмийга таяниб хабар бермоқда.

“АҚШ президенти Жо Байден маъмурияти Исроилдан “қонун ва тартибнинг бутунлай бузилиши” анклавдаги гуманитар инқирозни сезиларли даражада ёмонлаштираётганидан огоҳлантириб, ҲАМАС томонидан бошқариладиган фуқаро полициясига ёрдам юк машиналарини Ғазо секторига кузатиб қўйишга қаратилган ҳужумларни тўхтатишни сўради”, дейди портал хабарида.

Манбаларга кўра, сўнгги ҳафталарда биргина жанубий чегарадаги Рафаҳ шаҳрида Исроил ҳаво ҳужумларида юк ташиш хавфсизлигини таъминлаган 11 полициячи ҳалок бўлган. Шу йилнинг февраль ойи бошида уларнинг кўплари ўз лавозимларини тарк этган. Бу қуролли тўдалар ва умидсиз маҳаллий аҳоли учун ёрдам юк машиналарини ўғирлаш учун имкониятлар яратади.

Расмийлар Ғазо илгари дунёдаги энг қонунсиз ва хавфли шаҳар ҳисобланган Сомали пойтахти Могадишуга айланаётганидан тобора хавотирдалигини билдирган.

Ғазо секторидаги вазият 2023 йилнинг 7 октябрь куни кескинлашди. Бунга Фаластиннинг ҲАМАС ҳаракатининг ҳарбий қаноти томонидан эълон қилинган “Ал-Ақсо тўфони” операцияси доирасида Исроил ҳудудига юзлаб ракеталар учирилгани сабаб бўлди. Шундан сўнг ташкилот жангчилари Исроил жанубидаги чегара ҳудудларига кириб, у ерда ҳам ҳарбий, ҳам тинч аҳолига қарата ўт очган, шунингдек, 200 дан ортиқ одамни гаровга олган.

Исроил расмийларининг сўнгги маълумотларига кўра, ушбу ҳужум оқибатида тахминан 1,2 минг киши ҳалок бўлган, бу рақам тинч аҳоли, аскарлар, чет эл фуқароларини ўз ичига олади. Шунингдек, 5 мингдан ортиқ киши жароҳат олган.

Бунга жавобан Исроил мудофаа кучлари Ғазо секторида ҲАМАСга қарши “Темир қиличлар” операциясини бошлади. Бир неча кун ичида исроиллик ҳарбийлар Ғазо билан чегара яқинидаги барча аҳоли пунктларини назорат остига олди ва чизиқдаги нишонларга, жумладан, тинч аҳолига ҳаво ҳужумларини бошлади. Ўтган йилнинг октябрь ойининг охирида Исроилнинг анклавдаги операциясининг қуруқлик босқичи бошланди.

Маълумотларига кўра, 2023 йилнинг 7 октябридан бери Исроилнинг ҳужумлари оқибатида Ғазода 29 минг кишидан ортиқ одам ҳалок бўлган, 70 мингдан кўп одам жароҳатланган.