“Reuters” агентлиги Европа расмийларига таяниб хабар қилишича, АҚШ томонидан Эронга қарши ҳарбий амалиёт ўтказилиши эҳтимоли жуда юқори бўлиб, у яқин 24 соат ичида бошланиши мумкин. Манбага кўра, операциянинг аниқ кўлами ва вақти ҳозирча очиқланмаган.

Исроил расмийларидан бири “Reuters”га берган изоҳида АҚШ президенти Дональд Трамп Эронга қарши ҳарбий ҳаракатни амалга оширишга қарор қилгандек кўринаётганини, бироқ амалиёт қандай шаклда ўтиши ҳали аниқ эмаслигини айтган.

Шу билан бирга, Эрон АҚШ ҳужуми юз берган тақдирда жавоб зарбалари берилиши ҳақида қўшни давлатларни огоҳлантирган. “Reuters”нинг ёзишича, Теҳрон Саудия Арабистони, БАА ва Туркия каби минтақавий давлатларга, агар АҚШ Эронни нишонга олса, ушбу мамлакатларда жойлашган АҚШ ҳарбий базаларига ҳужум қилиниши мумкинлигини билдирган.

Эрондаги беқарорлик 29 декабрдан бошланган бўлиб, миллий валюта — риал қадрсизланиши ортидан келиб чиққан кўча намойишлари қисқа вақт ичида йирик шаҳарларга тарқалган. Ҳукумат маълумотига кўра, тартибсизликлар давомида тахминан 40 нафар ҳуқуқ-тартибот ходими ҳалок бўлган.

Эрон ташқи ишлар вазири Аббос Ароқчининг айтишича, 8 январдан бошлаб намойишчилар орасида «қуролланган террористлар» пайдо бўлган. Теҳрон зўравонликларни ташкил этишда Исроил ва АҚШни айблаган.