Apple компанияси янги маҳсулотларининг анъанавий кузги тақдимотини ўтказди. Эътиборлиси, ушбу бренд узоқ йиллардан бери биринчи марта янги iPhone турини намойиш этмади. Шундай бўлсада, қондаги кислород даражасини назорат қилишга қодир «ақлли» соатларнинг янги моделини бозорга чиқараётганини маълум қилди. Бу ҳақда Би-би-си хабар берди.

Аслида сўнгги йилларда Apple вакиллари айнан жорий йил сентябрь ойидаги тақдимотга ўзининг энг муваффақиятли маҳсулоти — янги русумдаги айфони билан ташриф буюришини айтиб келаётганди. Унга қизиқиш ҳам шунга яраша эди.

Аммо коронавирус пандемияси туфайли iPhone 12ни чиқариш муддати кейинга қолдирилди.

Apple Watch Series 6га келадиган бўлсак, унга, айтиб ўтганимиздек, қонда кислород даражасини назорат қилиш учун сенсор ўрнатилган.

Маълумки, айнан қонда кислород миқдорининг кескин тушиб кетиши коронавирусга чалинган беморлар соғлиғининг бирдан ёмонлашишига олиб келади. Бу эса ўпканинг зарарлангани билан боғлиқ.

Компания мутасаддиларининг таъкидлашларича, соатдаги янги функция касалликни эрта босқичларда аниқлаш имконини беради. Бироқ сенсор тиббий мақсадларда фойдаланиш учун мўлжалланмагани ҳам айтиб ўтилди.

Apple Fitness+ номи остида яна бир янги пулли сервисни ҳам тақдим этди. У iWatch қабул қиладиган биометрик маълумотлардан фойдаланиши, уларни машғулот видеоси билан биргаликда катта дисплей ёки телевизорда кўрсатиши мумкин.

Шунингдек, янги iPad Air ҳам кўпчиликнинг эътиборини тортган. Ушбу қурилмага A14 янги авлод процессори қўйилган. Компания хабарига кўра, мазкур айпад катта қувватга эга ҳамда жуда энергиятежамкордир.