Клублар ўртасидаги Жаҳон чемпионати 1/8 финалида Саудия Арабистонининг «Ал Ҳилол» жамоаси катта сенсация қайд этди. Улар мусобақанинг асосий фаворитларидан бири саналган «Манчестер Сити»ни драматик тарзда мусобақадан чиқариб юборишди. Қўшимча вақтга чўзилган ўйин 4:3 ҳисобида якунланди ва инглизлар мусобақани тарк этди.

Учрашувнинг 10-дақиқасида «Сити» ҳисобни очди. Бернарду Силва яқин масофадан аниқ зарба йўллаб, ўз жамоасини олдинга олиб чиқди. Бироқ бу голдан сўнг «Ал Ҳилол» фаол ҳаракатга ўтиб, қарши ҳужумлар уюштиришни бошлади. Улар биринчи таймда бир қанча вазият яратди, аммо зарбаларни аниқ якунлай олишмади.

Иккинчи тайм эса кучли қарама-қаршиликлар билан давом этди. 49-дақиқада «Сити» ҳимоячилари йўл қўйган хатодан сўнг Маркос Леонардо бош билан аниқ зарба бериб, ҳисобни тенглаштирди. Орқасидан Малком жамоасини олдинга олиб чиқди ва «Ал Ҳилол» 2:1 ҳисобида устунликка эришди.

Бироқ «Манчестер Сити» тез жавоб қайтарди. Эрлинг Ҳоланд рақиб жарима майдонида юзага келган вазиятдан унумли фойдаланиб, ҳисобни яна тенглаштирди — 2:2.

Қўшимча вақтда жамоалар курашни давом эттирди. 98-дақиқада Калиду Кулибали бурчак зарбасидан кейин бош билан зарба бериб, «Ал Ҳилол»ни яна олдинга олиб чиқди. Аммо «Сити» таслим бўлмади. 103-дақиқада Фил Фоден бурчакдан узатилган тўпни аниқ зарба билан дарвозага йўллаб, ҳисобни 3:3 кўринишига келтирди.

Шундан кейин ҳал қилувчи гол ҳам яқинлашди. 112-дақиқада Маркос Леонардо ўз дублини расмийлаштириб, жамоасига муҳим ғалаба келтирди.

Шу тариқа, «Манчестер Сити» «Интер»дан кейин мусобақанинг яна бир йирик қурбонига айланди. «Ал Ҳилол» эса катта ғалаба эвазига чемпионлик учун курашни давом эттиради.

Қайд этиш керакки, ҳамюртимиз Абдуқодир Ҳусанов мазкур учрашувда майдонга туширилмади.