Бугун, 18 ноябрь куни Ўзбекистон U-17 терма жамоаси Жаҳон чемпионатининг нимчорак финал ўйинида Италия ўсмирлар терма жамоасига 3:2 ҳисоби билан мағлубиятга учради ва мундиал билан хайрлашди.

Ушбу ўйиннинг 89-дақиқасида Ўзбекистон U-17 терма жамоаси ҳужумчиси Асилбек Алиев рақибининг провокацион ҳаракатига жавоб қайтаргани учун қизил карточка билан жазоланди. Бу эса терма жамоа бош мураббийи Ислом Исмоиловнинг жаҳлини чиқарди ва мураббий майдондан чиқиб кетаётган Алиевга жуда қўпол муносабат кўрсатди.

Ўйин якунланганидан сўнг, Ислом Исмоилов ушбу ҳолатга қуйидагича изоҳ берди:

«Алиев билан боғлиқ вазият учун кўпчилик мени танқид қилаётган бўлиши мумкин, лекин аввало ўртада ватан шаъни турибди. Биз болаларга роса тушунтирдик, ўйиндан олдин қанча гапирдик, ҳар қандай вазиятда эмоцияга берилмасликни, провокацияга учрамасликни қаттиқ тайинладик. Лекин шундан кейин ҳам бу воқеа бўлгани жаҳлимни чиқарди, керакли танбеҳни бердим. Тўғри қилдим, деб ўйлайман.

Ҳеч қандай муаммо йўқ. Бу сабоқ бўлади. Булар ёш бола эмас, профессионал футболга қадам қўйишяпти. Ечиниш хонасида ҳаммаси жойида, тушунмовчилик йўқ, керакли шаклда қўллаб-қувватладим».