Bugun, 18-noyabr kuni Oʻzbekiston U-17 terma jamoasi Jahon chempionatining nimchorak final oʻyinida Italiya oʻsmirlar terma jamoasiga 3:2 hisobi bilan magʻlubiyatga uchradi va mundial bilan xayrlashdi.

Ushbu oʻyinning 89-daqiqasida Oʻzbekiston U-17 terma jamoasi hujumchisi Asilbek Aliyev raqibining provokatsion harakatiga javob qaytargani uchun qizil kartochka bilan jazolandi. Bu esa terma jamoa bosh murabbiyi Islom Ismoilovning jahlini chiqardi va murabbiy maydondan chiqib ketayotgan Aliyevga juda qoʻpol munosabat koʻrsatdi.

Oʻyin yakunlanganidan soʻng, Islom Ismoilov ushbu holatga quyidagicha izoh berdi:

«Aliyev bilan bogʻliq vaziyat uchun koʻpchilik meni tanqid qilayotgan boʻlishi mumkin, lekin avvalo oʻrtada vatan shaʼni turibdi. Biz bolalarga rosa tushuntirdik, oʻyindan oldin qancha gapirdik, har qanday vaziyatda emotsiyaga berilmaslikni, provokatsiyaga uchramaslikni qattiq tayinladik. Lekin shundan keyin ham bu voqea boʻlgani jahlimni chiqardi, kerakli tanbehni berdim. Toʻgʻri qildim, deb oʻylayman.

Hech qanday muammo yoʻq. Bu saboq boʻladi. Bular yosh bola emas, professional futbolga qadam qoʻyishyapti. Yechinish xonasida hammasi joyida, tushunmovchilik yoʻq, kerakli shaklda qoʻllab-quvvatladim».